УИХ-ын чуулганы нэгдсэн хуралдаан 10:00 цагт Төрийн ордны Их хуралдай танхимд эхэллээ. Чуулганаар Төрөөс мөнгөний бодлогын талаар 2023 онд баримтлах үндсэн чиглэл батлах тухай” Улсын Их Хурлын тогтоолын төслийг хэлэлцэж байна.

Хэлэлцэж байгаатай холбоотой УИХ-ын гишүүд асуулт асууж, хариулт авч байна.

          УИХ-ЫН ГИШҮҮН Ж.МӨНХБАТ: Өнөөдөр ам.долларын ханш 3500 хүрээд талийж өглөө. Найман жилийн өмнө 1700 хүрч байхад би сөрөг хүчний гишүүнийн хувьд эсэргүүцэж акц хийж байлаа. Өнөөдөр хоёр дахин нэмэгдчихсэн байна. Цар тахал л яриад байдаг. Засгийн газар, Монголбанк экспортын хэмжээг нэмэх тал дээр юу болж байна вэ. Нүүрсний экспорт ямар байгаа юм бэ. Борлуулах асуудалд хил гааль, боомтын асуудал чухал байдаг. Төсөвт суулгасан уу. Гаднаас ам.доллар орж ирэхгүй, өмнөх зарсан нүүрсээ борлуулж байгаа гэх юм. Энэ үнэн үү. 
 

           МОНГОЛБАНКНЫ ЕРӨНХИЙЛӨГЧ Б.ЛХАГВАСҮРЭН: Гадаад худалдаа төлбөрийн тэнцэл дээр энэ шалтгаанууд тодорхой харагдаж байгаа. Гадаад худалдааны экспорт өсөж байгаа ч, импортоо нөхөж чадахгүй байна. Энэ нь БНХАУ-ын 0 ковидтой холбоотой. 

       Мөн АНУ-ын инфляц есөн хувьд хүрч өссөн учир АНУ-ын Төв банк бодлогын хүүгээ өсгөсөн. Гурван хувиар өсгөсөн учир ам.долларын үнэ өсөөд байна. Тиймээс манай Төв банкнаас бодлогын хүүгээ хатууруулсан. 

           САНГИЙН САЙД Б.ЖАВХЛАН: Боомтын сэргэлтийн асуудал маш чухал. Энэ ажлыг урт, дунд богино хугацааны ажил гэж хуваах хэрэгтэй. Манай экспортын хамгийн том боомт болох Гашуунсухайтад жил шахуу ажил хийсэн. Одоо экспортын хэмжээ эрс нэмэгдэж, 2019 оны мөн үед хүрээд байна. Урд хилийн боомтуудын бүтээн байгуулалтын ажил явж байна. 2023 оны төсвийн экспортын биет хэмжээг нэмэгдүүлж ирээд байна.

       УИХ-ЫН ГИШҮҮН С.ЧИНЗОРИГ: Иргэдийн амьжиргаа, орлогын байдал хүнд байна. Валютын ханшаа тогтворжуулна гээд интервенц хийсэн байх аа. Яагаад ам.долларын ханш өсөөд байгаа юм бэ. Хууль тогтоомжиндоо өөрчлөлт оруулж, гадаад валютын арилжаа эрхлэлтийг цэгцлэх, хязгаарлах чиглэлээр арга авахгүй юу. Найман шарга дээр зарласан ханш, Монголбанкны ханш хоёр 150 төгрөгийн зөрүүтэй байна. Мөн махны үнийг тогтворжуулах хууль яагаад хэрэгжихгүй байна вэ. Гурилын үнэ нэмэгдчихээд байна. Үнэ тогтворжуулах хууль яасан бэ.

      МОНГОЛБАНКНЫ ЕРӨНХИЙЛӨГЧ Б.ЛХАГВАСҮРЭН: Үнийн тогтвортой байдлын тухай хууль батлагдсан. Гэхдээ үнэ тогтворжуулалтыг арилжааны банкууд зохицуулахаар болсон. Бүх төрлийн шатахуун дээр нөөц бий, үнэ тогтвортой байгаа. Гурил үйлдвэрлэгч нарт санхүүжилт олгож байгаа.