Засгийн Газрын Хэрэг Эрхлэх Газрын дарга Д.Амарбаясгалан цаг үеийн асуудлаар мэдээлэл өглөө. Тэрбээр “Хоёр өдрийн турш Монголын ард түмэн сайдын хийсэн мэдэгдэлтэй холбогдуулж, ихээхэн шүүмжлэлийг Засгийн газарт мөнсалбар эрхэлсэн сайдад ирүүлж байгаа юм. Үүнтэй холбогдуулж, юун түрүүнд Засгийн газрын нэрийн өмнөөс ард иргэдэд бухимдал үүсгэсэндээ хүлцэл өчиж байна. Д.Сарангэрэл сайд нь Монгол Улсын Үндсэн хуулийн тодорхой зүйл заалтыг зөрчсөн  үйлдлийг гаргасан. 

     Үндсэн хуулийн 14-р зүйлд "Хүнийг үндэс угсаа, арьсны өнгө, нас хүйс, нийгмийн гарал, эрхэлсэн ажил, албан тушаал, шашин шүтлэг, үзэл бодол, боловсролоор ялгаварлан гадуурхаж үл болно" гэж заасан байдаг. Мөн 19-р зүйл заасны дагуу "Төр хүний эрх, эрх чөлөөг хангахуйц, эдийн засаг, нийгэм, хуул зүйн болон бусад баталгааг бүрдүүлэх, хүний эрх, эрх чөлөөг зөрчихтэй тэмцэх, хөндөгдсөн эрхийг сэргээн эдлүүлэх үүргийг иргэнийхээ өмнө хариуцдаг" заалт бий. Үүнтэй холбоотойгоор Монгол Улсын Ерөнхий сайд  Үндсэн хуулиар олгогдсон бүрэн эрхийнхээ хүрээнд дараах захирамжийг гаргалаа.

    -МОНГОЛ УЛСЫН ЕРӨНХИЙ САЙДЫН ЗАХИРАМЖ-

      Монгол Улсын Засгийн газрын гишүүнийг огцруулах тухай

    Монгол Улсын Үндсэн хуулийн 39 дүгээр зүйлийн 4 дэх хэсэг, Монгол Улсын Засгийн газрын 23 дүгээр зүйлийн нэг дэх хэсэг, хоёр дахь заалтыг тус, тус үндэслэн Д.Сарангэрэлийг Монгол Улсын Засгийн газрын гишүүн, Хөдөлмөр нийгмийн хамгааллын сайдын үүрэгт ажлаас огцруулах тушаал гаргалаа. Ерөнхий сайдын захирамжийг гарсантай холбогдуулж, Үндсэн хуулиараа УИХ болон Монгол Улсын Ерөнхийлөгчтэй зөвшилцөх албан бичгийг Засгийн газраас хүргүүлдэг. Ингээд огцруулах ажлыг өнөөдрөөс албан ёсоор эхлүүлж байна. Мөн Д.Сарангэрэл сайд ёс зүйн алдаа гаргаснаа ухамсарлаж, Засгийн газрын гишүүнээс чөлөөлөгдөх хүсэлтээ өгсөн" гэв.