Нийслэлийн асуудал хариуцсан сайд Ж.Сүхбаатар өчигдөр Төвлөрөл сааруулах, түгжрэлийн эсрэг Үндэсний хорооны хорооны тамга, тэмдгээ ЗГХЭГ-ын дарга Д.Амарбаясгаланаас хүлээн авсан. Тэгвэл тус хороо өнөөдөр хуралдаж, Засгийн газрын хуралдаанд оруулах зарим асуудлыг хэлэлцсэн байна. Үүнтэй холбоотой Нийслэлийн асуудал хариуцсан сайд Ж.Сүхбаатар өөрийн цахим хаягаараа дамжуулж, "Буяны цуваа энэ өдрүүдэд түгжрэлд нөлөөлдөг. Ламаас асуусан цагаар ихэвчлэн явагддаг, тэр нь түгжрэлийн оргил цагтай давхцдаг. Улсын нэгдүгээр төв эмнэлэгийн орчимд бөөгнөрөл үүсдэг. Буяны газрын удирдлагуудтай дараа уулзалт хийж ярилцахаар төлөвлөж байгаа…" хэмээн жиргэсэн нь олны дургүйцлийг төрүүлээд буй.

      Тэгвэл энэ талаараа тэрбээр  "Түгжрэлд маш олон хүчин зүйл бий. Хэн ч буяны ажлыг буруутгахгүй нь ойлгомжтой. Шарил хадгалах газраа буруу байршилд байлгаж байгаа тухай асуудал. Эмнэлэг, буяны газруудтай хамтарч ажиллан зан үйлийн ёслолыг хотын төвөөс өөр илүү зохистой байршилд шилжүүлэх тухайд өгсөн хариулт.  Заавал мушгин гуйвуулж байж “таашаал” авах нь зарим хүний сэтгэл ханамж юм даа…" гэх тайлбарыг хийжээ.