Иргэний үнэмлэх, жолооны үнэмлэх, төрсний гэрчилгээ зэрэг 74 лавлагаа мэдээллийг нотариатаар баталгаажуулах шаардлагагүй болжээ. Энэ талаар Цахим хөгжил, харилцаа холбооны сайд Н.Учрал мэдээлэл хийлээ.

       Тэрбээр “Цахим хөгжил харилцаа холбооны яамны гол зорилго нь төрийн үйлчилгээг иргэдэд хүнд сурталгүй хүргэх юм. Үүний үр дүнд манайд авлигын индекс буурах ёстой. Иргэд төрийн үйлчилгээг хүнд сурталгүй, түргэн шуурхай авах хэрэгтэй. Өнгөрсөн хаврын чуулганаар Цахим гарын үсэг, Кибер, аюулгүй байдалтай тэмцэх, Хувь хүний мэдээллийг хамгаалахтай холбоотой хуулийн төслүүдийг баталсан. Өнөөдөр хуулийн хэрэгжилтийг хангуулах тал дээр анхаарч байна.

      Иргэдийн мэдээллийг хүлээж авдаг 1111 төвд төрийн үйлчилгээ, нотариаттай холбоотой гомдол их ирдэг. Ингээд тодорхой шийдэлд хүрч, санамж бичигт гарын үсэг зурах гэж байна. Төр иргэний үнэмлэх, жолооны үнэмлэх, нас барсны гэрчилгээ, гэрлэлтийн баталгаа зэргийг өөрөө өгчихөөд бүх төрлийн киосик машин, ТҮЦ машинаас лавлагаа аваад өгөхөөр нотариатаар дахин баталгаажуулж байгаа нь зохимжгүй юм. Үүнийг таслан зогсоох зорилгоор Нотариатчидын танхимтай зөвшилцөж, И-Монголиа цахим системээс авсан лавлагааг нотариатаар гэрчлэх шаардлагагүй болсныг мэдээлж байна. Үүнд 74 тооны лавлагаа орно. Хэрвээ үүнийг нотариатаар баталгаажуулах шаардлага тавьсан бол гомдол гаргах боломжтой" гэлээ.