"Хуур" хөгжмийн наадмын үеэр урилгаар ирж уран бүтээлээ толилуулсан реппер “Lil Pump”-тай холбоотой дүрс бичлэг олон нийтийн сүлжээнд цацагдсан. Тэгвэл тус бичлэгтэй холбоотойгоор "Хуур" хөгжмийн наадмын зохион байгуулагч "BRB" компанийн  захирал Ж.Энхжаргалан мэдээлэл хийлээ.

   Тэрбээр “Өчигдөр 13 цагийн орчимд реппер “Lil Pump”-ийн твиттер хаягаас дүрс бичлэг цацагдсан. Манайх бичлэг цацагдсаны дараа репперийн менежменттэй холбоо тогтоож албан ёсны тайлбар болон дүрс бичлэг устгах хүсэлт тавьсан. “Lil Pump”-ын компаниас бидэнд “Монгол Улсад хийгдсэн гэсэн ямар ч баримтгүй дүрс бичлэг, мөн садар самуунтай холбоогүй, эмэгтэй хүнийг доромжилсон зүйл гараагүй. Мөн реппер хандалт авсан энэ төрлийн дүрс бичлэг хийж тавьдаг. Тэр бичлэгүүдийн нэг" гэсэн тайлбар өгсөн.  Бид хариуд нь тус дүрс бичлэгийг устгуулах хүсэлт тавьж, өчигдөр орой 20:00 цагт устгуулсан. Албан ёсоор хэлэхэд манай хамт олон тус дүрс бичлэгтэй ямар ч хамааралгүй. Олон нийтийн зүгээс хандалт авах гэж ташаа мэдээлэл  тарааж байна. Ямар нэгэн байдлаар албан ёсны нотолгоотой мэдээлэл  гарч, репперт гомдол  гарвал манай хамт олноос хохирогчийн талд орж, хамтарч ажиллана. Энэ асуудлаас болоод "Хуур" хөгжмийн наадмын нэр хүндэд халдаж байгаа нь харамсалтай байна. Тус бичлэгтэй холбоотой цахим хаягийн эзэн манайд ирсэн  мэдээллээр Монгол Улсад байхгүй байгаа юм билээ” гэв.