Боловсрол шинжлэх ухааны яамны сайд Л.Энх-Амгалан мэдээлэл хийхдээ багш нарын ур чадварыг дээшлүүлэх, цаашлаад зургаан түвшинд ажлын гүйцэтгэлийг үнэлж нэмэгдэл олгохоор боллоо. 

      Тэрбээр “Боловсролын чанарын асуудлыг онцгойлон анхаарах цаг болсон байна. Тийм учраас цаашид бүтээмжээс илүү чанарын тогтолцоон дээр илүү анхаарч ажиллана. Боловсролын салбарын шинэчлэлийн хүрээд сангийн яамнаас дэмжиж, хамтарч ажиллаж байгаа. Ковидын нөхцөл байдлаас үүдэж хоёр жил орчим сурлагын хоцрогдол үүссэн. Тиймээс бид багшын ур чадварыг дээшлүүлж сурлагын хоцрогдлыг нөхөж ажиллана. Багшын ажлыг үнэлэх журманд өөрчлөлт оруулсан. Багш нарын цалинг хамгийн доод тал нь 1 сая 50 мянган төгрөгөөс эхлүүлнэ. Мөн чадварлаг багш хөтөлбөрийг хэрэгжүүлэн багш нарын ур чадварыг нэмэгдүүлэх тал дээр анхаарна. Багшын нарыг үнэлэхдээ нэгдүгээрт суралцагчдад боловсрол эзэмшүүлэх явцад үр дүн гарах, суралцагчыг төлөвшүүлж, хүмүүжүүлэх явцад үр дүн гаргах, өөрийнхөө ажлын байран дээрх тасралтгүй хөгжил, сургуулийн болон олон нийтийн үйл ажиллагаанд оролцох ийм дөрвөн шалгуураар багш нарыг үнэлдэг болно. Мөн эцэг эх, суралцагч, сургуулийн захиргааны үнэлгээгээр багшыг дүгнэнэ. Ингээд багш нарыг зургаан түвшинд ангилж, нэгдүгээр түвшний багш нарт үндсэн цалингийн 25 хувийн нэмэгдэл олгоно. Хоёрдугаар ангиллын багш нарт 20 хувь, гуравдугаар ангилалд 15 хувь гэх мэтээр нэмэгдэл урамшуулал олгоно. Ур чадварын нэмэгдлийг нийт багш нарын 15 хувь нь л авдаг байсан бол одоо багш нар өөрийн ажлын гүйцэтгэлийг үнэлүүлээд 40 хүртэлх хувийн нэмэгдэл авдаг болно. Сургууль хоорондын ялгаа, ажлын хэрэглэгдэхүүний хомсдол үүсгэхгүйгээр санхүүгийн зохицуулалт хийгдсэн. Үнэлгээний энэхүү судалгаан дээр ажилласан багш нартаа талархлаа гэдгийг илрэхийлье. Монгол Улс боловсролын үндэсний үнэлгээний тогтолцоонд шилжсэн том ажил боллоо. Цаашид их дээд  сургуулиуд болон коллежид үүнийг хэрэгжүүлнэ“ гэв.