Монгол Улсын Үндсэн хууль, Засгийн газрын тухай хуулийг үндэслэн УИХ-ын Инновац, цахим бодлогын байнгын хорооны дарга Н.Учралыг Цахим хөгжил, харилцаа холбооны сайдаар томиллоо. Үүнтэй холбоотойгоор Цахим хөгжил, харилцаа холбооны сайд Н.Учралын АТГ-т мэдүүлсэн ХОМ-ийг хүргэж байна.

УИХ-ын гишүүн, Засгийн газрын гишүүн, Цахим хөгжил, харилцаа холбооны сайд Н.Учрал 1987 онд Улаанбаатар хотод төрсөн. 2003 онд “Их Засаг” лицей сургууль, 2007 онд Их Засаг олон улсын их сургууль, 2010 онд Лимкоквин технологийн их сургуулийн Их Британийн Лондон хотын салбар сургууль, 2012 онд Монгол Улсын Боловсролын их сургууль, 2020 онд Их Британийн Хатан хааны нэрэмжит Букингхамын их сургуулийг тус тус төгссөн. Эрх зүйч мэргэжилтэй. Бизнесийн удирдлага, түүхийн ухаан, олон улсын менежментийн магистр, түүхийн ухааны доктор зэрэгтэй. Өдгөө эхнэр, хүүхдүүдийн хамт амьдардаг. Тэрбээр

• 2010-2016 онд “Рояаль” Академийн ерөнхий захирал, удирдах зөвлөлийн дарга,
• 2012-2014 онд Нийслэлийн Монгол Ардын Намын хорооны Улс төрийн хэлтсийн дарга,
• 2012-2016 онд Баянзүрх дүүргийн иргэдийн Төлөөлөгчдийн Хурлын төлөөлөгч,
• 2015 онд Шадар сайдын Хэвлэл мэдээлэл, олон нийттэй харилцах бодлогын зөвлөх,
• 2016 оноос одоог хүртэл Монгол Улсын Их Хурлын гишүүн,
• 2018-2020 онд Монгол Улсын Их Хурлын Цахим бодлогын түр хорооны дарга,
• 2020 оноос  Монгол Улсын Их Хурлын Инновац, цахим бодлогын байнгын хорооны даргаар ажиллаж байгаа юм

​

Цахим хөгжил, харилцаа холбооны сайд Н.Учрал 803 сая төгрөгийн орлоготой. Харин түүний гэр бүлийн гишүүдийн орлого нь 196 төгрөг. Тэрбээр 150 сая төгрөгөөр үнэлэгдэх газар, 3.5 тэрбум төгрөгөөр үнэлэгдэх үйлчилгээний зориулттай байр, гурван орон сууц, хоёр зуслангийн байшинтай.

                     Мөн нийт 685 сая төгрөгийн “Nissan Tiida-1”, “Toyota Land Cruiser-200”, “Lexus-570”, “Mercedes Benz-S400” автомашинтай. 85 сая төгрөгөөр үнэлэгдэх үнэт эдлэл, 31.4 сая төгрөгийн 180 хонь, 20 адуутай юм байна. Н.Учрал “Эвэргрийнлайф” ХК, “Эрдэнэс тавантолгой” ХК, “Гоц жаалууд цэцэрлэг ХХК”, “Рояал Академи” ХХК, “Грийн Ланд групп” ХХК, “Массив трейд” ХХК, “Их Засаг олон улсын их сургууль ХХК”-д хувьцаа эзэмшдэгээс гадна гурван тусгай зөвшөөрөлтэй. Тэрбээр дотоодод нийт 1.6 тэрбум төгрөгийн хадгаламжтай гэж АТГ- мэдүүлжээ.