Монгол Улсын Ерөнхий сайд Засгийн газрын шинэ бүрэлдэхүүнийг Монгол Улсын Ерөнхийлөгчид танилцуулав. Монгол Улсын Үндсэн хуулийн 39 дүгээр зүйлийн 3, 4 дүгээр зүйлд заасны дагуу Монгол Улсын Ерөнхий сайд Лувсаннамсрайн Оюун-Эрдэнэ Монгол Улсын Засгийн газрын гишүүнээр томилогдохоор нэр дэвшээд байгаа хүмүүсийг Монгол Улсын Ерөнхийлөгч Ухнаагийн Хүрэлсүхэд танилцууллаа.

 Энэ үеэр Ерөнхийлөгч У.Хүрэлсүх “Сайд болсон та бүхэнд амжилт хүсье. Хурдан шуурхай хурал, зөвлөгөөнүүдээ хийж, яаралтай ажилдаа орох хэрэгтэй. Хоёр хоногийн дараа есдүгээр сарын 1-н болно. Өвлийн бэлтгэл ажил, хадлан тариалан, өвөлжилттэй холбоотой томоохон төсөл, хөтөлбөрүүдийг цаг алдалгүй хийх, улс орны өмнө тулгарч буй ажлуудыг шуурхайлах шаардлагатай байгаа. Тиймээс ажилдаа хурдан орцгоо. Сайн ажиллах хэрэгтэй шүү” гэсэн юм.