МАН-ын Удирдах зөвлөл өнөөдөр Төрийн ордонд хуралдаж, Засгийн газрын сайд нарын бүтцийн асуудлыг хэлэлцсэн.

                                    Хурлаар МАН-ын Ерөнхий нарийн бичгийн дарга Д.Амарбаясгаланг ЗГХЭГ-ын даргаар томилох санал гаргаж, МАН-ын Удирдах зөвлөлөөс дэмжсэн. Улмаар Д.Амарбаясгалан ЗГХЭГ-ын даргаар ажиллах нь тодорхой болж байна. Тэгвэл МАН-ын дүрмийн 29.2-т “Ерөнхий нарийн бичгийн дарга орон тооны байх бөгөөд өөр ажил, албан тушаал эрхлэхийг хориглоно” гэж заажээ. Намын дүрэмд тусгасны дагуу ЗГХЭГ-ын даргаар ажиллах болсон Д.Амарбаясгалангийн оронд МАН-ын Ерөнхий нарийн бичгийн даргаар шинэ хүн сонгогдохоор болж байгаа юм.

Үүнтэй холбоотойгоор МАН-ын дараагийн генсекээр хэн ажиллах тухай асуудал яригдаад эхэллээ. Сүүлийн хэдэн өдрийн турш МАН-ын удирдлагуудын хэмжээнд хэд хэдэн хувилбар яригдсан гэх ч мэдээлэл бий. Харин тэр дундаас өдгөө Ерөнхийлөгчийн Тамгын газрын даргаар ажиллаж байгаа Я.Содбаатарын хувилбар илүүтэй яригдсан гэх.

Өнөөдөр Ерөнхий сайд Л.Оюун-Эрдэнэ сайдаар томилогдохоор яригдаж байгаа албан тушаалтнуудыг өрөөндөө дуудаж, уулзалт хийсэн. Энэ үеэр Ерөнхийлөгчийн Тамгын газрын дарга Я.Содбаатар өрөөнд нь орж уулзсан. Тиймээс Я.Содбаатарыг дараагийн МАН-ын Ерөнхий нарийн бичгийн даргаар сонгогдох магадлал өндөр, бүр “баараггүй” болоод байгаа гэхэд хилсдэхгүй боллоо.

МАН-ын дүрэмд зааснаар намын Ерөнхий нарийн бичгийн даргыг томилох, чөлөөлөх эсэхийг Бага хурал зөвлөлдөж, шийддэг аж. 2016 оноос хойш МАН-ын генсекеер ажилласан Д.Амарбаясгалан ЗГХЭГ-ын даргаар томилогдоход МАН-ын дараагийн Ерөнхий нарийн бичгийн даргыг МАН-ын Бага хурлын 479 гишүүн хуралдаж, сонгох юм.