Шинэ Засгийн газар 21 сайдтай байхаар болжээ. Эх сурвалжийн мэдээлснээр дан дээлтэй сайд долоо, давхар дээлтэй 14 сайд томилохоор болсон байна. Үүнээс гурван сайд нь ямар нэгэн яаманд харьяалагдахгүй аж. Мөн 21 сайдын 10-ыг нь УИХ-аас сонгохоор болсон байна. Харин Ерөнхий сайд Л.Оюун-Эрдэнэ Сангийн сайд Б.Жавхлан, Боловсрол соёл, шинжлэх ухааны сайд Л.Энх-Амгалан, Хууль зүй, дотоод хэргийн сайд Х.Нямбаатар нарыг авч үлдэнэ гэх мэдээлэл бий. Мөн Ерөнхийлөгч У.Хүрэлсүх өөрийн хамаарал бүхий таван сайдаа авч үлдэх хүсэлтэй байгаа аж. Үүнд Н.Тавинбэх, Г.Ёндон, Г.Сайханбаяр, Л.Халтар, Б.Батцэцэг нар багтдаг гэх.

      Ерөнхий сайд Л.Оюун-Эрдэнэ шинэ Засгийн газрын бүтцээ даваа гарагт УИХ-д оруулахаар болсон байна. Тодруулбал, Ерөнхий сайд кабинетынхаа бүтцийг Шинэ сэргэлтийн бодлогыг хэрэгжүүлэхэд анхаарч боловсруулсан гэх мэдээлэл бий. Тиймээс даваа гарагт Засгийн газрын бүтцээ оруулж, дараа нь Засгийн газрын гишүүдийн нэрсээ тодорхой болгох аж.