Үндсэн хуулийг өөрчилж сайд нарыг солих том ажлын үеэр улс төрийн бүлэглэл  ил болсон. Учир нь, бүгд л  фракцаасаа сайд тодруулах гэж улайрснаараа улайрч, улаан шүүсээ шахацгааж байна. Улс төрийнхнийг тэр аяараа ямар нэгэн яамны сайдын эрх мэдлийг гартаа, багтаа атгахын тулд эцсээ хүртэл амь тавин тэмцэж, тэмцэлдэж байгааг монголчууд харлаа.

     Тухайлбал, өчигдөр Үндсэн хуульд нэмэлт, өөрчлөлт оруулах тухай хуулийг 62 гишүүн өргөн барьж, хоёр цагийн дотор анхны, эцсийн хэлэлцүүлгийг хийж баталсан билээ. Энэ үеэр улс төрийн хөшигний цаана тоглоод сурчихсан бүлэглэл тодорхой болж, иргэдийн таамаглалыг баталж байна. Үндсэн хуулийн нэмэлт, өөрчлөлтөөр Ерөнхийлөгч У.Хүрэлсүх Засгийн газрын гишүүдийн 40 хувийг томилох. МАН-ын Ерөнхий нарийн бичгийн дарга Д.Амарбаясгалан 40 хувь Ерөнхий сайд нар болон УИХ-ын дарга нар 20 хувьд нь өөрсдийн хүнээ томилох эрхтэй болсон.

Тухайлбал, Зам, тээврийн хөгжлийн сайдаар Б.Чойжилсүрэн, Уул уурхай, хүнд үйлдвэрийн сайдаар Г.Тэмүүлэн, Эрүүл мэндийн сайдаар Ж.Чинбүрэн томилогдох хамгийн эхний улс төрийн таамаглал гарсан байна. 

Харин шинэ сайд нарыг олны хэл ам, дайралтаас хамгаалж, хэсэгтээ чулуу хөөлгөх арга хэрэглээд амжсан. Тэдний энэ нарийн зохион байгуулалттай мэхэнд М.Оюунчимэг, С.Бямбацогт, Д.Сарангэрэл тэргүүтэй гишүүд нэр холбогдож, олны амаар бол сайд болоод, бүр муулуулаад амжсан.

     Харин Ерөнхий сайд Л.Оюун-Эрдэнийн түших ханиа болгодог цөөн хэдэн сайдад Боловсролын сайд Л.Энх-Амгалан, Сангийн сайд Б.Жавхлан Хууль зүй, дотоод хэргийн сайд Х.Нямбаатар нар зүй ёсоор ордог учир яаж ч байсан тэднийгээ халаасандаа багтаана гэсэн үг. Энэ ёсоор Х.Нямбаатарыг ЗГХЭГ-ын даргаар томилж, Ц.Нямдорж цэцийн дарга болох шоо Монголын улс төрд буужээ. Харин Л.Энх-Амгалан, Б.Жавхлан нарыг сайдаар нь үлдээж байгаа нь тодорхой.

    Үүнээс гадна Гадаад харилцааны сайд Б.Батцэцэг, Байгаль орчин, аялал жуулчлалын сайд Б.Бат-Эрдэнэ нар УИХ-ын дарга Г.Занданшатарын хүн гэж ярьдаг. Тийм учраас тэдэнд сайдын суудалд үлдэхээс гадна хэд хэдэн боломж санал болгосон байна. Түүний нэг нь тэднийг сайдын суудлаа өгөөд дараагийн сонгуульд бэлдэхийг санал болгосон ч сайдаар ажиллах шийдвэр гаргасан гэх. Харин үлдсэн яамны сайд нарын суудалд Сү Батболдын фракцаас Б.Энхбаяр, Ц.Мөнх-Оргил, Д.Цогтбаатар нар сайд болно гэх бор шувуу Төрийн ордноор төдийгүй ард түмний дунд нисэж байна.