Ардчилсан намын бүлгээс өнөөдөр мэдээлэл хийлээ.

          Энэ үеэр Ардчилсан намын бүлгийн дарга О.Цогтгэрэл “УИХ-ын Ардчилсан намын бүлэг өнгөрсөн хоёр жилийн хугацаанд үл ойлголцолтой явсан. Сүүлд хаврын чуулганы төгсгөлд намын бүлгийн удирдлагыг шинээр томилох тухай зүйлийг нэлээд тодорхой заасан. Энэ хүрээнд шинээр бүлгийн даргаа сонгож, нэмэлт өөрчлөлт орсон хуулийн дагуу өчигдөр УИХ-ын дарга УИХ-ын нэгдсэн чуулганд уншиж, танилцуулснаар баталгаажиж, өнөөдөр Ардчилсан намын анхны бүлгийн хуралдаан боллоо. Сүүлийн 30 жилийн хугацаанд Монгол Улсын хөгжил дэвшилд Ардчилсан намын үүрэг оролцоо, дуу хоолой өндөр явж ирсэн. Цаашдаа Ардчилсан намын бүлэг үйл ажиллагаандаа өнгөрсөн хугацаанд гарч байсан алдаа, дутагдлаа засан, залруулж, үндсэн үзэл баримтлал, байр сууриа хамгаалж, улам олуулаа болж ажиллана” гэв.

Энэ үеэр сэтгүүлчдээс дараах асуултыг тавж, хариулт авлаа.

-Ардчилсан намын  бүлгийн эв нэгдлийг хангах тал дээх хэрхэн ажиллах вэ?

     -Сүүлийн үеийн үйл явдлыг харж байхад, Ардчилсан намын УИХ дахь бүлгийн гишүүдийн хувьд аль нэг талыг барьж туйлшрахгүйгээр төвийн байр суурь дээр болох чиглэлийг барьж ажиллана гэдэг байр суурьтай гишүүдийн тоо нэмэгдэж байна.

-УИХ-ын тухай өөрчлөлтөөр бүлгийн даргыг сонгохдоо бүлгийн нийт гишүүн оролцож сонгоно гэсэн өөрчлөлт байсан. Танай намын зарим гишүүн таныг бүлгийн даргаар сонгосныг хүлээн зөвшөөрөхгүй байгаа гэж сонссон. Энэ тухайд тайлбар өгөөч?

    -Тухайн өргөн барьсан хуулийн нэмэлт өөрчлөлт “Бүлгийн удирдлагыг сонгохдоо бүлгийн нийт гишүүдийн олонхоор” гэсэн ганцхан заалттай. Аливаа олонхид хоёр олонхийн тухай яриа байдаг.  Нэг нь хуралд оролцсон гишүүдийн олонхи. Ардчилсан намын бүлэг албан ёсны саналын 11 гишүүнтэй. Хэдэн  ч гишүүн оролцсон, зургаагаас дээш гишүүн санал нэгдэх ёстой. Нийт гишүүдийн саналаар сонгогдох ёстой зүйл биш.

-Таныг бүлэгт нь хүлээн зөвшөөрөхгүй байгаа гишүүн бий юу?

     -Аливаа асуудалд гишүүн бүр мэдээж өөр, өөрийн байр сууринаас хандана. Зуун хувь зүйл гэж хаана ч байхгүй. Бүлэгт янз бүрийн санаа бодолтой гишүүд байгаа. Тэр дундаа Д.Ганбат гишүүний хувьд байр сууриа илэрхийлж байгаа байх.