Засгийн газрын бүтцэд өөрчлөлт оруулж, дан дээлтэй сайд нарыг суудлаас нь буулгах яриа, сураг гараад байна. Олон нийтийн сүлжээнд Засгийн газрын Хэрэг эрхлэх газрын дарга Ц.Нямдорж, Зам, тээврийн хөгжлийн сайд Л.Халтар, Эрчим хүчний сайд Н.Тавинбэх, Уул уурхай, хүнд үйлдвэрийн сайд Г.Ёндон, Хөдөлмөр, нийгмийн хамгааллын сайд А.Ариунзаяа, Эрүүл мэндийн сайд С.Энхболд, Хүнс, хөдөө аж ахуй, хөнгөн үйлдвэрийн сайд З.Мэндсайхан, Соёлын сайд Ч.Номин нар сайдын суудлаасаа буух нь тодорхой болж, дараагийн сайдын тохироо хийгдсэн гэж хүртэл ярьж, бичиж байна.

          Мөн цахим орчинд Л.Оюун-Эрдэнийн Засгийн газарт УИХ-ын гишүүн Н.Учрал, Ж.Мөнхбат, Х.Болорчулуун, Д.Сарангэрэл, Б.Саранчимэг, Д.Оюунчимэг нар нэмэгдэж, сайдын суудал залрах таамаглал хүртэл гарчээ. 

Харин Шадар сайд С.Амарсайхан, Батлан хамгаалахын сайд Г.Сайханбаяр, Гадаад харилцааны сайд Б.Батцэцэг, Байгаль орчин, аялал жуулчлалын сайд Б.Бат-Эрдэнэ, Хууль зүй, дотоод хэргийн сайд Х.Нямбаатар, Боловсрол, шинжлэх ухааны сайд Л.Энх-Амгалан нар суудалдаа хэвээр үлдэх тохироо хийсэн байж болзошгүй гэх.

Тэгвэл сайдын суудлаасаа бууж магадгүй сайдуудаас байр суурь авлаа. Эхний удаад Зам, тээврийн хөгжлийн сайд Л.Халтар, Хүнс, хөдөө аж ахуй, хөнгөн үйлдвэрийн сайд З.Мэндсайхантай холбогдсон юм.

ЗАМ, ТЭЭВРИЙН ХӨГЖЛИЙН САЙД Л.ХАЛТАР: Одоогийн байдлаар надад мэдсэн, сонссон юм алга. Үндсэн хуулийн цэцийн шийдвэрийг ч мэдэхгүй байна. Дан дээлтэй сайд нарыг буулгах яриаг мэдээгүй. Надад хэлэх тайлбар, байр суурь одоохондоо алга байна.

ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН САЙД З.МЭНДСАЙХАН: Надад хэлэх юм алга. Одоогоор дуулж, мэдсэн юм байхгүй. Би албан ажлаар, орон нутагт томилолттой явна. Тийм учраас дан дээлтэй сайд нарын асуудлыг сонсоогүй, мэдээгүй.