Шадар сайд С.Амарсайхан Эмээлт дэх махны үйлдвэрт хийсэн шалгалтын асуудлаар Мэргэжлийн хяналтын ерөнхий газрын мэргэжилтнүүдтэй уулзлаа.

            Энэ үеэр Шадар сайд С.Амарсайхан “Ямар ч сэтгэлгүй, асуудлыг шийдэх зорилго алга байна шүү дээ. Энэ та нарын ажлын үндсэн үүрэг. Наадмаар амралтгүй ажилласан гэх нэрээр үндсэн ажлаа хаяж болохгүй. Мал эмнэлгийн ерөнхий газрын лаборатори яагаад ийм удаан хойрго, асуудлыг удаан шийдвэрлэж байна вэ. Засгийн газрын бодлого, шийдвэрийг яагаад хэрэгжүүлэхгүй байна вэ. Сүх далайтал үхэр амар гэдэг шиг яасан тайван, ичиж эмээхээ байчихсан газар болчихсон юм. Бүхэл бүтэн гурван сар шүү дээ. Үүний ард та бүхний ах дүү, ар гэрийнхний эрүүл аюулгүй амьдрах асуудал хамт яваа. Асуудал хариуцсан юм бол бичиг цаасыг нь гаргаад ир. Зөрчлийн хэрэг нь хуулийн дагуу шалгаад явна. Хариуцсан байгууллага нь лабораторид хийсэн шинжилгээг үндэслээд шийдлээ гаргаад, хэрэгжүүлсэн байх ёстой. Ингэж хүний толгой эргүүлж, ингэж хариулахаар болдог гэсэн бүтэлгүй, явуургүй зангаа боль. Та нар төрийн албан хаагч. Гадаа гутал, хувцас зардаг хүмүүс биш. Надтай та нар ингэж харьцаж байгаа юм чинь бусадтай яаж харьцаж ажиллах вэ. Би энэ асуудлыг чинь мэддэг, хариуцсан сайд нь шүү. Мэргэжлийн хяналтын байгууллага мэргэжлийн байж, төрийн байгууллагын үлгэр жишээ байх ёстой. Ил тод нээлттэй, зохион байгуулалттай байх ёстой. Дунд шатны дарга нараа хаацайлсан, ажил хийдэггүй замхруулдаг байж болохгүй. Зургадугаар сард эхэлсэн шалгалтын ажил өнөөдрийг хүртэл шийдэгдээгүй байж болохгүй" гэв.