УИХ-ын гишүүн Т.Аюурсайхан “ууртай” байгаа. Учир нь, тэрбээр сүүлийн хоёр ч чуулганы хурал дээр сайд нарыг, Төрийн нарийн бичгийн дарга нарыг загнаж, ажлаа өгөхийг шаардаад байна. Тодруулбал, тэрбээр хоёр хоногийн өмнөх чуулганы хурлын үеэр Зам тээвэр, хөгжлийн сайд Л.Халтарыг зэмлэсэн.

        УИХ-ын гишүүн Т.Аюурсайхан “Дарханы зам хэзээ эхэллээ. Энэ олон жил яагаад дуусгаж чадахгүй байна вэ. Газар дээр нь ажиллахдаа заавал Ерөнхий сайдыг аваачих хэрэг байсан уу, Л.Халтар сайд аа. Энэ таны ажил. Хэчнээн төгрөгийн зардал гарч байна вэ. Гүйцэтгэгчдээ мөнгөө өгчихсөн, нөгөө хэд нь алга болчихсон. Шүүхээр явахаар хугацаа алдаад байгаа учир дахиж төсөв гаргаж байна гэсэн сураг сонслоо. Энэ зэргийн асуудлыг та яагаад хийж болохгүй байна вэ. Арай л хэтэрч байна. Нэг хүнийг хэд хуваах вэ. Боомт руу, Дарханы зам руу аваачна. Иргэд олон нийт маш их бухимдалтай байна. Зарим сайддаа хариуцлага тооц гэж байна. Тэргүүн эгнээнд таны нэр явж байна. Болж бүтэхгүй бол ажлаа өгөөд яв, юунд нь зууралдаад байгаа юм. Гүйцэтгэгч нараа яагаад шахаж чаддаггүй байгаа юм бэ. Дундаа ороод алга болдог уу. Шулуухан уучлалт гуйгаад ажлаа өгвөл яасан юм бэ. Яаж ширэн нүүрлээд ингэж явдаг юм” гэсэн юм.

         Харин өчигдөр тэрбээр ЗГХЭГ-ын дарга Ц.Нямдоржийн хүү, Гадаад харилцааны яамны Төрийн нарийн бичгийн дарга Н.Анхбаярыг шүүмжиллээ.

 Тодруулбал, чуулганы хуралдааны үеэр УИХ-ын гишүүн Т.Аюурсайхан “Хуралдааны талаар шивнээд шахуу хоёр улсын хоорондын энгийн харилцааны талаар ярьж байхад ГХЯ-ны ТНБД Н.Анхбаяр “Ярьж байгаа зүйл чинь таалагдахгүй байна” гээд утсаа салгаж байна. Ийм том дарга нар бий болжээ. Хууль үйлчлэхгүй болохоор ингээд байдаг юм уу. Төрийн нарийн бичгийн дарга нар Засгийн газарт ажлаа тайлагнадаг. ЗГХЭГ-ын дарга Ц.Нямдорж гуай өөрийн чинь төрсөн эцэг. Төрийн ажлыг төрсөн эцгийнхээ өмнө хариуцна гэж юу байдаг юм. Нийтийн албаны ашиг сонирхлын хууль зөрчиж байгаа хэрэг шүү. Аль нэг нь ажлаа хийх ёстой. Одоо хар даа, хэрэлдээд сууж байна. Төрийн ажлыг эцгийнхээ өмнө хийхээр ийм болдог юм байна. Сургалтын төлбөрөө төрөөр даалгачхаад, ирээд төрд таван жил ажиллаад цайруулчихдаг. Яасан сайхан юм. Тэгвэл залуусаа гадаадад төрийн мөнгөөр сургаж, төгсөөд ирэхээр нь ажилд авъя. Чамтай адилхан байлгаж, дарга болгоод, дэмжмээр байна. Хүн юм хэлэхээр урдаас хэрэлдээд, томроод байх юм. Би яривал ярина шүү. Эрдэнэт үйлдвэрт нэг тэрбум гаруй төгрөгийн шахаа хийж байсан шүү дээ. Тэрийгээ “Тэр чинь тэдхэн төгрөг” гээд сууж байсан” гэв.

         Харин ГХЯ-ны Төрийн нарийн бичгийн дарга Н.Анхбаяр өөрийн цахим хуудастаа "Томилгооны асуудал яриад, таалагдаагүй болохоор" хэмээн пост бичиж, Т.Аюурсайхан гишүүнтэй бичсэн чатаа баримтаар оруулжээ. Санаа нь, Т.Аюурсайхан гишүүн өөрийн хүнээ Туркийн Элчин сайдын яаманд “шахах”-аар ТНБД Н.Анхбаяр руу чат бичжээ. Харин түүний хүсэл биелээгүй учир хувь хүн, хувийн асуудал, ар гэр рүү дайрч байна хэмээн ТНБД Н.Анхбаяр үзэж байгаа аж.

Бид энэ талаар Гадаад харилцааны яамны Төрийн нарийн бичгийн дарга Н.Анхбаяраас тодрууллаа.

       Тэрбээр “Миний өчигдөр цахим хуудастаа оруулсан зүйл үнэн. Төрийн албандаа гол биш. УИХ-ын гишүүн Т.Аюурсайхан хувь хүн рүү байнга дайраад байна шүү дээ. Төрийн албаны зүгээр ажлаа хийж байгаа хүмүүсийг чуулганы индэр ашиглаж, ингэж болохгүй. Тийм биз дээ. УИХ-ын гишүүн Т.Аюурсайхан томилгооны асуудлаар над руу бичсэн нь үнэн. Өөр ярих зүйл алга” гэв.