Монгол түмний уламжлалт баяр наадам болоход сар хүрэхгүй хугацаа үлджээ. Өнгөрсөн даваа гарагт Монгол Улсын Гавьяат жүжигчин, УДЭТ-ын жүжиг Г.Амгаланбаатар албан ёсны цахим хуудастаа “Төр засгаас 100, 101 жил гээд л сүржигнээд байх юм. Энэ жил төрийн наадмын нээлт стадионд болох нь худлаа боллоо шүү. Ард түмэн минь их юм хүлээгээд хэрэггүй шүү. Өнөөдөр зургаадугаар сарын 13. Одоо болтол төрөөс шийдэгдсэн мөнгөнөөс ганц ширхэг хадаасны мөнгө ч орж ирээгүй байна. Ид шидтэн л биш бол амжихаа байлаа” гэж бичсэн нь цахим сүлжээнд тархаад байв.

                     Тэгвэл өчигдөр Соёлын сайд Ч.Номин баяр наадмыг зохион байгуулах Ажлын хэсгийн комиссын хуралдаанд оролцож байх үеэрээ дээрх асуудалд тайлбар өгчээ. Тэрбээр “Энэ жилийн баяр наадмын хүндэтгэлийн тоглолтыг иргэдэд илүү ойртуулах үүднээс Сүхбаатарын талбайд зохион байгуулна. Нэр бүхий уран бүтээлч баяр наадмыг зохион байгуулахад шаардагдах төсөв хөрөнгө өгөөгүй талаар худал мэдээлж байна. Уг ташаа мэдээллийг баяр наадмын бүтээлд оролцоогүй уран бүтээлчид дур мэдэн түгээсэн. Энэ жилийн баяр наадмыг 2.3 тэрбум төгрөгөөр тэмдэглэнэ. Өнөөдрийн/өчигдрийн/ байдлаар нэг тэрбум төгрөгийг шилжүүлээд байгаа” гэсэн байна.