Засгийн газрын хуралдааны үеэр Эрчим хүчний сайд Н.Тайванбэх Шинэ сэргэлтийн бодлогод тусгагдсан, эрчим хүчний чиглэлээр хэрэгжих, төсөл арга хэмжээний хэрэгжилтийн явцын талаар мэдээлэл өглөө.

     Тэрбээр “Шинэ сэргэлтийн бодлогод эрчим хүчний чиглэлээр таван зорилтыг дэвшүүлж, 23 төсөл арга хэмжээг хэрэгжүүлэхээр төлөвлөсөн байгаа. Эдгээрийн ихэнх нь өсөн нэмэгдэж байгаа цахилгаан эрчим хүчний хэрэгцээг хангах эх үүсвэрүүдийн төсөл, хөтөлбөр, арга хэмжээ юм. Өнгөрсөн хугацаанд бид холбогдох бэлтгэл ажлыг амжилттай хангасны үр дүнд өнөөдөр шинэ сэргэлтийн бодлогод тусгагдсан томоохон төсөл, хөтөлбөрүүдийн барилга угсралтын ажил эхэлж байна. Арван аймгийн дулааны станцын барилга угсралтын ажлыг долоон аймагт эхлүүлсэн. Сэргээлтийн эрчим хүчний дунд бага чадлын таван эх үүсвэрийг баруун бүсэд барьж ашиглалтад оруулахаар, барилга угсралтын ажил нь эхлээд явж байна. Мөн Ховд аймгийн Мянгад суманд баригдах нарны эх үүсвэр барилга угсралтын ажил дуусаж, ашиглалтад орсон. Энэ долоо хоногт Амгалангийн дулааны станцын өргөтгөлийн төслийг эхлүүлнэ. Улаанбаатар хотын Сонгино дэд станцыг түшиглэн, цэнэг хураагуурыг барихаар ажиллаж байна. Харин Тавантолгой дулааны цахилгаан станцын хувьд хоёр дахь удаа тендер зарласан бөгөөд зургадугаар сарын 16-нд хугацаа нь дуусна.

   Харин Багануурын дулаан цахилгаан станцын хувьд хувийн хэвшлийн түншлэлээр хийгдэж байгаа. Мөн Бөөрөлжүүтийн нүүрсний  уурхайг түшиглээд дулааны цахилгаан станцыг хувийн хэвшилтэй хамтарч барьж ашиглалтад оруулахаар шинэ сэргэлтийн бодлогод тусгасан. Ирэх долдугаар сарын 15-нд энэ станцын барилга угсралтын ажлын нээлтийг хийхээр ажиллаж байна.  Эрдэнэбүрэнгийн усан цахилгаан станцын хувьд Монголын талаас авах арга хэмжээ, нүүлгэн шилжүүлэлтээс бусад ажил бүрэн хангасан. Хятадын талд зээлийн тусгайлсан хэлэлцэл хийж байна. IV ДЦС-ын хүчин чадлыг мөн нэмнэ. Ер нь цаашдаа цахилгаан дулааны үнийг өртөгт нийцүүлэх шаардлагатай. Энэ тохиолдолд манай салбарын төслүүд гаднаас зээл авах бүрэн боломж бий. Цахилгаан дулааны эрэлт жилээс жилд өссөөр байна” гэв.