Шүүхээс Н.Түвшинбаярт 16 жил хорих ял оноолоо.

    Энэ үеэр түүний өмгөөлөгч Л.Данзанноров ”Би тухтай уулзсангүй. Сэтгэл санааны хувьд амаргүй байна. Нээлттэй шүүх хуралдааны үеэр тодорхой мэдээлэл авсан байх. Шүүх хурлын хувьд ямар нэгэн будлиантай зүйл байхгүй. Угаас шүүх хуралдаан энэ зарчмаар явдаг.  Хоёр талыг хангалттай сонслоо, талуудын хүсэлт тавьсан гэрчүүдийг биечлэн оролцууллаа. Шүүх хурлын мэтгэлцээний зарчим зарчмын дагуу боллоо. Үндэслэлүүдээ их тодорхой тайлбарласан.  Шүүх бол Прокуророос шилжүүлсэн яллах дүгнэлтийн хүрээнд асуудлыг шийддэг. Энэ дээр гэрчээр оролцсон хүмүүс ийм тодорхой байдлаар нөлөөлөөд, ийм буруу зүйл хийгээд энэ хэрэгт нөлөөлсөн гэсэн дүгнэлт ирээгүй. Ирүүлсэн хэргийн хүрээний хэмжээнд шүүх шийдвэрээ гаргасан. Ямар нэгэн хариуцлага тооцох асуудал яригдаагүй.

   Хохирогчдын хувьд эмчилгээний зардлыг төлөхөд Н.Түвшинбаярын хувьд анхнаасаа чармайлттай байсан. Энэ хохирлын асуудлыг ялгаж, салгаж ойлгох ёстой. Гарсан зардлын ихэнх нь Солонгост болон Монголд эмчлэгдсэн эмчилгээний зардал руу шилжиж байсан. Хүмүүсийн хандлага болохоор Б.Нандинцэцэг ихэнх мөнгийг нь авчихлаа гэсэн хандлага байна. Хохирлын ихэнх хэсэг буюу хоёр тэрбум гаруй нь эмнэлэг рүү явсан. Н.Түвшинбаяр болон ард түмний хувьд Э.Энхбат начныг босоод ирээсэй гэж хүсэж байсан. Энэ ч үүднээс эмчилгээнд нь анхаарлаа зориулж байсан. Хохирогчдод учирсан бусад зардлыг мөн тусад нь тооцоод шүүх хуралдааны үеэр гарсан баримтын хувьд бүрэн төлсөн. Хохирогчийн талаас хүүхдүүдийн сургалтын төлбөрийг 70 сая орчим төгрөг нэхэмжилсэн гэвэл өрөөсгөл болно. Гэхдээ үр хүүхдэд нь жилд энэ хэмжээний зардал гардаг гэж хэлсэн. Үүнтэй холбоотой хохирол, зардлыг Н.Түвшинбаяр цаашид төлнө, анхаарна гэдгээ илэрхийлсэн” гэв.