УИХ-ын чуулганы нэгдсэн хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2022.04.30-ны өдөр өргөн мэдүүлсэн,хэлэлцэх эсэх/ асуудлыг хэлэлцэж байна. Энэ үеэр гишүүд хэлэлцэж буй асуудалтай холбоотой асуулт асууж, хариулт авлаа.

УИХ-ын гишүүн Ц.Даваасүрэн: Өр яагаад бий болоод байгааг Г.Занданшатар дарга тодорхой болго гэлээ. Энэ тодорхой байгаа. Халамжаас болж үүсэж байгаа юм. Ард түмнээсээ бид дэмжлэг авахын тулд халамжийн бодлогоо хавтгайруулсан. Түүнээсээ ухарч чадахааргүй болчихсон. Энэ нь хэдэн их наядаар яригддаг. Бид энэ мөнгөөр хичнээн экспорт, импортыг орлох бүтээгдэхүүний үйлдвэр, цахилгаан станц барихаар болсон. Нэг суманд таван үйлдвэр барих, нэг аймагт 10 үйлдвэр барихаар мөнгийг зарцуулсан. Энийг Сангийн яам шаардах ёстой. 2000-2012 он хүртэл 1.5 ам. долларын зээлтэй байлаа. Гэтэл одоо жилд 6-7 тэрбум төгрөгийн өрд ороод байна. Бид халамжаа зээлээр өгч байгаа гэдгээ яаралтай ард түмэнд хэл. Өр бидний хэр хэмжээнээс хэтэрчихлээ. Нэг нь өр тавиад нөгөө нь зээлээ авч төлсөөр байгаад таарлаа. Нүүрсээ хүртэл зээлээр төлж байна. 

 УИХ-ын гишүүн Ц.Туваан: Халамж, хөдөлмөр эрхлэлт хоёр нэг циклд орчихсон. Өнөөдрийн байдлаар Засгийн газрын өр 8.5 тэрбум ам.доллар, Төв банк 2:5 тэрбум ам.доллар, бусад банк 1.6 тэрбум ам.доллар, бусад салбар нь 8.7 тэрбум ам.доллар, компани хооронд 12.7 тэрбум ам. доллар, нийт 33.2 тэрбум ам.долларын өртэй байна. Үүнийг Монголын өр гэхээс өөрөөрөө нэрлэхгүй. Хатуухан хэлэхэд Монгол Улсын дөнгөж төрсөн иргэн бүр 31 сая төгрөгийн өртэй байна. Бид сонгуулийн сурталчилгаа болгож, 15 сая гэж байсан бол нэг дахин нэмэгдсэн.