Засгийн газрын ээлжит хуралдааны үеэр Хөгжлийн банкны гүйцэтгэх захирал Н.Мандуул мэдээлэл өглөө.

   Тэрбээр“ Бидний зүгээс одоогийн байдлаар “Самурай” бондын эргэн төлөлтийн гуравны нэгийг Монгол банк дахь тусгай дансанд байршуулаад байна. Мөн “Самурай” бондын бонд эзэмшигч нартай хэлэлцээр эхлүүлсэн. Зах зээлийн ханшаараа иргэн буцаан худалдан авах хэлэлцлийг цаашид үргэлжлүүлээд явна. Чингис хаан банкны хувьд Хөгжлийн банкнаас хадгаламж байршуулсан гэрээ бий. Бид Чингис хаан банканд үүссэн өр төлбөрийг шүүх, хууль хяналтын байгууллагатай хамтарч ажиллан, цаашид эргэн төлөхөд анхаарч ажиллана.

Бид нийт зээлийн багцаа гурав хувааж үзэж, бүх талтай гэрээ хэлэлцээр хийж байна. Ялангуяа, төслөө зориулалтаар нь ашиглаад төсөл нь хэрэгжиж байгаа, зах зээл, ковид зэрэг шалтгаанаар төсөл нь саатсан зээлдэгчдэд уян хатан байхаар ажиллаж байна.

  Дараагийн хэлэлцэлд орж гэрээгээ шинэчлэхийн тулд банкны зүгээс магадлан шинжилгээ хийх ёстой байдаг. Тэгэхээр зарим зээлдэгч нарт бид нэмэлт магадлан шинжилгээ хийгээд, шинээр үүссэн зарим баримт гарч ирээд байна. Гэхдээ зургадугаар сарын 30-нд манайх хагас жилийн тайлангаа гаргах ёстой. Энэ хүртэл бид төрийн өмчит компаниудын чанаргүй зээлд шийдвэр гаргуулж, ажиллагаа хийнэ. Хөгжлийн банкны чанаргүй зээлийн эргэн төлөлтөд дэмжлэг туслалцаа үзүүлэх ажлын хэсэг байгуулах чиглэл гарсан. Энэ ажлын хэсэг ямар нэгэн барьцаа хөрөнгө хураахгүй. Ажлын хэсгээс ерөнхий бодлого болон зарим зарчмын шийдэл гаргах, шаардлагатай байгаа асуудалд зөвлөмж, чиглэл өгөх чиг үүрэгтэй ажиллана. Мэдээж эцсийн шийдвэрийг Хөгжлийн банк өөрсдөө гаргана” гэв .