Хөвсгөл аймгийн Цагаан-Уул сумын төвийн 1.1 км хатуу хучилттай автозамын шав тавих ёслол боллоо. Тодруулбал, түлхүүр гардуулах гэрээний нөхцөлтэй уг замын шав тавих ёслолд Хууль зүй, дотоор хэргийн сайд Х.Нямбаатар тэргүүтэй албаны хүмүүс оролцжээ. Х.Нямбаатар сайд тэргүүтэй албаныхан онгоцоор Цагаан-Уул суманд очиж, сумын удирдлагууд мөнгөн аягатай сүүтэй угтжээ. Тус зам нь ирэх арваннэгдүгээр сарын 30-нд ашиглалтад орох бөгөөд улсын комисст хүлээлгэн өгөх аж.

          Харин цахим орчинд иргэд “Хэмнэлт хийнэ гэсэн яасан бэ. Ганцхан км замын шав тавих ёслолд Хууль зүй, дотоод хэргийн сайд Х.Нямбаатар онгоцоор очих шаардлага байсан уу. Төсвийн мөнгийг хэмнэхэд албан тушаалтнууд өөрөөсөө эхлэх хэрэгтэй” зэргээр сэтгэгдлээ илэрхийлж, шүүмжилж байна.

Бид энэ талаар Хууль зүй, дотоод хэргийн сайд Х.Нямбаатараас тодруулахад “Би ажлаа хийж явна шүү дээ. Би ямар зугаалж яваа биш дээ” гэлээ.