УИХ-ын Халдашгүй байдлын дэд хороо өчигдөр дөрвөн гишүүний бүрэн эрхийг түдгэлзүүлэх асуудлыг хэлэлцсэн билээ. Тодруулбал, УИХ-ын гишүүн Н.Алтанхуяг, Ё.Баатарбилэг, Х.Ганхуяг, Г.Амартүвшин нарын бүрэн эрхийг түдгэлзүүлэх санал прокурор гаргаж, уг саналыг хэрхэх талаар тус дэд хороо хуралдсан юм. Харамсалтай нь, Халдашгүй байдлын дэд хорооны дарга Н.Энхболд гишүүн өвчтэй байсан учир ямар ч шийдвэр гаргаж чадаагүй билээ.

        Бид УИХ-ын гишүүн Н.Энхболдын туслахтай холбогдож, түүнийг хэзээ ажилдаа орох талаар нь лавлалаа. Тэрбээр “Н.Энхболд гишүүнийг хэзээ эдгэрч, хэзээ ажилдаа орохыг нь бид мэдэхгүй. Биеийн байдал, өвчний хүндрэл зэргийг бид урьдчилан мэдэх боломжгүй шүү дээ. Хэзээнээс эхэлж өвдсөнийг нь хэлэх боломжгүй. Халдашгүй байдлын дэд хороо руу залгаж, хурал хэзээ болохыг нь асуух нь зүйтэй” гэлээ.