Засгийн газрын нэгдсэн хуралдаан үргэлжилж, хуралдааны зарим шийдвэрийг танилцуулж байна. Энэ үеэр ХХААХҮ-ийн сайд З.Мэндсайхан “Мах, гурилын үнийг тогтвортой болгож, нөөц бүрдүүлэхээр тодорхой арга хэмжээ тусгагдсан. Гурил үйлдвэрлэгч аж ахуйн нэгжүүд болон дотоодын мах бэлтгэлийн аж ахуйн нэгжүүдэд 234 тэрбум төгрөгийн эх үүсвэрийг гурван хувийн хүүтэй гаргахаар болсон. Зээлийн зөрүү 10.6 хувь буюу 25 тэрбум орчим төгрөгийн хүүг улсын төсвөөс дэмжлэг болгож гаргахаар болсон. Энэ нь мах, гурилын үнийн өсөлтийг даруй бууруулах юм. Хоёрдугаарт, төв суурин газрын иргэдийн хэрэгцээнд зориулж 12.2 тонн мах бэлдсэн. Тус махны 30 хувь нь үхрийнх үлдсэн нь хонь, ямааных байгаа юм. Засгийн газар өнөөдөр хонины махан дээр 350 төгрөгийн хөнгөлөлт үзүүлэхээр болсон. Тэгэхээр нөөцийн хонины мах 8300-7950 төгрөг болж хямдарна. Мөн амралтын өдрүүдэд нөөцийн мах бэлтгэсэн аж ахуйн нэгжүүд гулуузаар нь борлуулах боломжтой. Энэ үед 7750 төгрөг болж хямдарна” гэв.