-Судалгаагаар төрийн 1000 гаруй автомашинд 11 тэрбум төгрөгийн зардал гаргадаг нь тогтоогдсон-  

         Ерөнхий сайд Л.Оюун-Эрдэнэ “Төрийн албан хаагчид Улаанбаатар хотод том оврын, тансаг автомашинаар зорчихгүй, ашиглахгүй. Эдгээр автомашиныг нэгдсэн зогсоолд байршуулна. Цаашлаад төрийн албан хаагчдын тасалгаанд метр, квадратын шалгуур тавих зэрэг бусад хэмнэлттэй холбоотой асуудлыг Засгийн газар шийдвэрлэлээ” хэмээн мэдэгдсэн билээ.

Харин УИХ-ын дарга Г.Занданшатар “Дөрөвдүгээр сарын 11-нээс УИХ-ын харьяа байгууллагуудын удирдлага хотод "570, 200" унахгүй. Төрийн хэмнэлтийг манлайлан ажилла. Хэмнэлтийг өөрсдөөсөө эхэлье. УИХ-ын зардлыг өмнөх төсвийн тодотголоор 5.6 тэрбумаар танасан. Гишүүний зардал 11 хувиар, Байнгын хорооны зардал 16 хувиар хасагдсан. Дахин 10-аас багагүй хувиар танахаас өөр аргагүй" хэмээсэн юм.

Тэгвэл одоогийн байдлаар төрийн албанд хэчнээн тооны том оврын автомашин байгаа, тэдгээрийг зарах боломж байгаа эсэх талаар Төрийн өмчийн бодлого зохицуулалтын газрын дарга  Б.Цэнгэл мэдээлэл өглөө.

           Тэрбээр “Монгол Улсын ЗГХЭГ-аас өгсөн чиглэл, үүргийн дагуу Төрийн өмчит бодлого зохицуулалтын газар ажиллаж байна. Энэ хүрээнд төрийн өмчит компани, төсөвт байгууллага, яам, агентлагт ашиглагдаж байгаа том оврын тээврийн хэрэгслийн судалгааг гаргасан. Судалгаанд 1000 орчим автомашин хамрагдаж, үүнээс үүдэлтэйгээр жилд 11 тэрбум төгрөгийн зардал гарч байгаа нь тогтоогдсон. Зардлыг ангилж үзвэл, автомашины жолооч нарын цалин дөрвөн тэрбум, даатгал, татварт гурван тэрбум, сэлбэг хэрэгсэлд нэг тэрбум төгрөг зарцуулж буй судалгаа гарсан. Зөвхөн 1000 орчим машинд хийсэн судалгаагаар жилд 11 тэрбум төгрөгийн зөрдөл гарч байгаа нь үрэлгэн зардал байна гэж үзэж байгаа. Төрийн өмчит компаниудаас гаргасан судалгаар нийтдээ 10 орчим мянган тээврийн хэрэгсэл бий. Эдийн засгийн хүндрэлтэй үед төр шинээр автомашин худалдаж авахгүй. Бүгдийг нь хориглочихсон байгаа. Харин цаашид автомашин худалдан авч, парк шинэчлэлт хийхдээ байгаль ээлтэй, бага оврын мотортой машин авах журам гаргана. Одоогийн байдлаар 200 гаруй том овын жийпийг төвлөрүүлнэ. Үүнээс бололцоотой автомашинуудыг зарж, мөнгийг нь улсын төсөвт суутгана. Мөн шаардлагатай байгууллагад буву шүүх, хууль хяналтын байгууллагад хэрэгтэй автомашиныг нь шилжүүлж өгнө” гэв.