УИХ дахь МАН-ын бүлэг ээлжит хуралдаанаа хийлээ. Хуралдаанаар энэ оны төсөвт тодотгол хийх асуудлыг хэлэлцсэн байна. Энэ талаар УИХ-ын гишүүн Ч.Хүрэлбаатар "Манай эдийн засагт тулгамдаж байгаа гол асуудал нь  үнийн өсөлт. Үүнийг бид 2021 онд хөндөж ярьж байсан. Урд хөршид халдвар нэмэгдэж, нөхцөл байдал амаргүй байна.  Үүнээс гадна Украины дайнтай холбоотой хойд хил дээр гадаад худалдааны бэрхшээл удаан хугацаанд үргэлжилэх нь. Энэ онд нөхцөл байдал сайжирна гэсэн хүлээлттэй байснаа өөрчилж байна. Үнийн өсөлттэй холбоотой жагсаал явсан. Үүнтэй  холбоотойгоор төсөвт тодотгол хийхээр болсон. Үүний гол зорилго нь ам.долларын ханш, төгрөгийн ханш дээр ирж байгаа дарамтыг бууруулах ёстой. Мөн одоо хүндрэлтэй байгаа тээвэр ложистикийн асуудалд нэмэлт ачаалал үүсгэхгүй байхад анхаарна. 

        Бүлгийн гишүүд төсвийн тодотгол хийхийг 100 хувийн саналаар дэмжсэн. Ийм нөхцөл байдалд богино хугацааны үр дүн гаргахын тулд төсвийн тодотгол хийхийг ойрын үед УИХ, Засгийн газарт мэдүүлнэ. Энэ удаагийн төсвийн тодотголыг жижиг зардлыг хасаад болчихно гэж ойлгож болохгүй. Хөрөнгө оруулалт, ханшийг зөрүү, гаднын зээл зэргийг анхаарах учраас томоохон асуудал болно гэж харж байна" гэлээ.