УИХ-ын чуулганы нэгдсэн хуралдааны үеэр УИХ-ын гишүүн П.Анужин үзэл бодлоо илэрхийллээ. Тэрбээр “УИХ-ын гишүүд ярьдаг шигээ, хуралддаг шигээ байсан бол монголчуудын амьдрал өөр байх байлаа. Тэгэхээр хурлаа багасгаж, ажлаа хийх хэрэгтэй. Би эмнэлэгт сэхээнд байгаа хүүхдээ гурав хоног сахиад ажилдаа ирж байгаа ээж, УИХ-ын гишүүн байна. Гэрийнхээ цонхоор тойргийнхоо асуудлыг харчихаад УИХ-ын чуулган дээр ганган асуулт асуух нь нэг хэрэг. Сэхээний тасгаас хүүхдээ сахиж байгаа ажилдаа ирэх нь өөр асуудал. Яагаад ирц бүрдэхгүй байна вэ гэдгийг дарга нар бодох хэрэгтэй. Энд би сууснаараа ард түмний амьдрал гэрэл гэгээтэй болж байвал ирмээр л байна шүү дээ. Зүгээр сууснаар, ирц шахсанаар иргэдийн амьдрал сайжирдаггүй юм. Эмнэлгээр ханиад нь хатгалгаа болчихсон, амьсгалж чадахгүй хүүхдүүдээ тэвэрсэн аав, ээж нар наашаа, цаашаа болж, суух ч газаргүй байна. Энэ талаар яагаад ярихгүй байгаа юм. Бидний хийж байгаа ажил цагаа олохгүй байна. Та бүхний инээсэн зургууд чинь олон нийтэд таалагдахгүй байна. Инээсэн зургаа яагаад мөнгө төлж сошиалаар явуулж байгаа юм. Ард түмэн инээсэн цагт бид инээх ёстой биз дээ. Гэтэл ард түмэн инээхгүй байна, зовж байна” гэв.