УИХ-ын нэгдсэн хуралдаан үргэлжилж байна.

   Энэ үеэр УИХ-ын гишүүн Ц.Идэрбат “Монгол Улсын Ерөнхийлөгчөөс санаачилсан “Тэрбум мод” хөтөлбөр нь үндэсний хэмжээний хөтөлбөр болж, олон хүнд ойн мод тарих ач холбогдлыг ойлгуулсан арга хэмжээ болж байгаа. Засгийн газар мөн ойн агентлагтай болж байна. Ойн эрхзүйн асуудалд хэлэх хэдэн санаа байна. Нэгдүгээрт, Хэнтий аймгийн хувьд Ойн сангийн нөөцөөр улсын хэмжээнд дөрөвт ордог, 1.7 сая га ойн сантай аймаг. Ойтой сумдуудад зарим нэг асуудал бий. Нэгдүгээрт, бид мод тарина гэж байна. Одоо байгаа ойгоо бид хортон мэргэжлээс хамгаалах ажил дээр яах вэ, Сибирийн хүр хорхой манай ойд нэлээн голомтолдог ажилд хэрхэн хандах вэ. Байгаа жаахан ой дээрээ хүр хорхойн устгал хийх ёстой гэхэд хийж чадахгүй явж байх жишээтэй.  Тэгэхээр ойн газар, яам ойгоо хамгаалах тал дээр анхаарах хэрэгтэй болов уу. Хоёрдугаарт, мэргэжлийн боловсон хүчний асуудал байна. Өнөөдөр мэргэжил сургалт үйлдвэрлэлийн төв дээр ойн анги нээгдэхэд, огт хүн суралцахгүй байна.

Тэгэхээр ойн асуудлыг хурцаар тавьж байгаа цаг үед боловсон хүчнийг дэс дараатай бэлдэхгүй бол мод суулгах, тарих хоёрын хооронд нэлээн мэргэжлийн ялгаа байдаг юм билээ.

     Иймээс боловсон хүчний асуудалд ойн эрхзүйн зохицуулалт бий юу гэж асуумаар байна. Дараагийн нэг зүйл нь орон нутагт зүрх сэтгэлээ зориулж мод үржүүлдэг олон хүн байна. Эдгээр хүмүүс ажлаа хийе гэхээр газрын асуудал их байдаг. Газрын тухай хуулиараа яамны зүгээс санаачилгатай ажлаасай гэж хүсэж байна.  Мод үржүүлгийн чиглэлээр олон жил ажилласан туршлагатай хүмүүст газрыг нь олгох тал дээр зөвхөн дуудлага худалдаа олгох гэдэг хатуу  зарчмыг зөөлрүүлээд өгөх бололцоо байна уу. Тэгвэл бид ойгоос мод шилжүүлэх биш, өөрсдөө үржүүлээд хоёр жил арчилж хамгаалаад, дараа нь шаардлагатай газраа суулгахад нэлээд том дэмжлэг болох юм” гэв.