Засгийн газраас гаргасан ээлжит шийдвэрийн талаар танилцуулж байна. Энэ үеэр Барилга, хот байгуулалтын сайд Б.Мөнхбаатар мэдээлэл өгсөн юм. Тэрбээр “ Урд хил хаалттай үед бид өнгөрсөн намраас Оросоос арматур төмөр оруулж ирж байна. Манай улсад жилд 300 мянган тонн арматурын хэрэгцээ байдаг. Энэ жил 100 мянган тонн арматур оруулж ирсэн. 40-50 мянган тонн нь ирж байгаа. Оросоос барилгын материал, арматур төмөр оруулж ирдэг компаниудыг бодлогоор дэмжиж ажилласан. Тэдгээр компаниудад сүүлийн үед валютын хомсдол, мөнгө шилжүүлэх хүндрэл тулгарч байгаа. Улсын төсвийн хөрөнгө оруулалтаар хийж байгаа ажлууд, үнийн өсөлтөөс хамаарах ажлуудад магадлал хийж, төсвийг дахин тодотгож байгаа. Өнгөрсөн онд найман хувийн зээлийг зургаан хувь болгож ипотекийн зээлийн санг өргөтгөж, нэг их наяд 95 тэрбум төгрөгийг барилгын салбарт оруулсан. Үүний дүнд 13995 өрх орон байртай болсон. Ипотекийн зээлийн төлөлтийг хойшлуулснаар хүндрэл учирч байна” гэв.