Улсын Их Хурал 2019-2024 онд хууль боловсруулах, хэлэлцэх шатанд иргэдийн оролцоог хангах зорилгоор цахим парламент болох гол стратегийг боловсруулсан. Иргэд олон нийтийн саналыг хуулийн төсөлд тусгах, иргэдтэй хамтран хэлэлцүүлэг өрнүүлэх, хүсэлт гомдлыг нь хүлээн авах, сонгогчдод парламент бүрэн нээлттэй байх гэсэн үндсэн функцтэй “D-Parlianment” апликэйшн, D.Parlianment.mn сайтад нэвтэрч хуулийн төслүүдэд санал өгөх боломж бүрдсэн. Мөн нийгэмд тулгамдаж буй сэдвээр тус платформ дээр цахим хэлэлцүүлэг өрнүүлэх боломжтой. Тиймээс иргэдийн санал, дэмжлэгийг авч тоон хэмжээст хүрснээр тухайн асуудлыг УИХ заавал хэлэлцэн шийдвэрлэх үүрэг хүлээж байгаа юм.

    Иргэд сонгосон төлөөлөлдөө шаардлага тавихын зэрэгцээ, төрийн эрх барьж хууль тогтоох үйлсэд оролцох боломжийг тус апликэйшнээр дамжуулан олгож байгаа юм. Манай улс цахим парламенттай болохын хүрээнд өнгөрсөн хугацаанд УИХ Нийтийн мэдээллийн ил тод байдлын тухай хууль, Хүний хувийн мэдээлэл хамгаалах тухай хууль, Цахим гарын үсгийн тухай хууль, Виртуал хөрөнгийн үйлчилгээ үзүүлэгчийн тухай хууль, Кибер аюулгүй байдлын тухай анхдагч хуулийн төслүүдийг баталж байна.