Сонгинохайрхан дүүргийн Татварын хэлтсийн ажилтан Э гэх эмэгтэйг саатуулжээ. Тодруулбал, АТГ-аас өчигдөр тус дүүргийн Татварын хэлтсийн байцаагч Э-ийн албан өрөө болон гэрт нь нэгжлэг хийсэн гэнэ. Түүнийг эрх мэдэл, албан тушаалаа урвуулан ашиглаж, бусдаас их хэмжээний авлига авсан байж болзошгүй нөхцөл байдал тогтоогдсон учир 48 цагийн хугацаатай саатуулсан талаар бид өмнө нь мэдээлсэн билээ.

Энэ талаар эх сурвалж бидэнд мэдээлэхдээ “Татварын байцаагч Э-г БНХАУ-ын хөрөнгө оруулалттай “Шинжиан шинфа” ХХК-ийн удирдлагуудтай үгсэн тохиролцож, тус компанийн татварыг нуун далдахад туслалцаа үзүүлж, их хэмжээний авлига авсан гэх үндэслэлээр саатуулсан байна лээ. Э нь тус хэлтэст олон жил ажиллаж байгаа, туршлагатай байцаагч. Уг авлигын хэрэг нь ганцхан “Шинжиан шинфа” ХХК-аар ч тогтохгүй байж мэдэх нөхцөл байдал бий болсон гэнэ” гэсэн юм.

Тэгвэл хятадуудаас авлига авч, татварыг нь нуун далдалдсан Сонгинохайрхан дүүргийн татварын байцаагч Э гэж хэн бэ.

          Түүний талаар эх сурвалж бидэнд хэлэхдээ “Э нь тус дүүргийн татварын хэлтэст олон жил ажиллаж байгаа. Аж ахуйн нэгж хариуцсан таван хэлтсийн нэг албанд нь ажилладаг. Аж ахуйн нэгж, уул уурхайн компаниудын татварыг хариуцдаг учраас авлигын хэрэгт холбогдсон байх. “Шинжиан шанфа” ХХК нь Сонгинохайрхан дүүргийн 20 дугаар хороонд байрладаг учраас Э байцаагч хариуцдаг байсан. Олон жилийн өмнөөс л хамтарч ажилласан” гэлээ.

            Ташрамд дурдахад, “Шинжиан шинфа” ХХК нь Төрийн банкнаас 2017 оны Ерөнхийлөгчийн сонгуулийн өмнө 20 тэрбум буюу өндөр үнэтэй зээлийг хууль бусаар гаргуулж авсан. Зээлийн эргэн төлөлт заасан хугацаанд хийгдээгүй тул тус компанийн удирдлагуудад шүүхээс ял оноосон байдаг. Тодруулбал, Чингэлтэй дүүргийн Эрүүгийн хэргийн анхан шатны шүүхээс “Шинжиан Шинфа” ХХК-ийг Төрийн банкинд их хэмжээний хохирол учруулсан хэмээн үзэж, “Шинжиан Шинфа” ХХК-ийн хувьцаа эзэмшигч БНХАУ-ын иргэн Сун Гуан Чуанд хоёр жилийн хорих ял, тус компанийн гүйцэтгэх захирал Ц.Энхтунгалагт 1.6 жилийн хорих ял оноосон юм. Мөн “Шинжиан Шинфа” компаниас 20 тэрбум төгрөгийн хохирлыг гаргаж, Төрийн банканд төлүүлэх шийдвэр гарсан байдаг.

Мөн “Шинжиан шинфа” компанийн удирдлагууд нь 2021 онд Монголын улстөрчид дарамтлуулж, зодуулж, сүрдүүлэгт өртөж, концесс эзэмших эрхээсээ татгалзаж, гарын үсэг зурсан хэмээн хууль хяналтын байгууллагад хандаж, уг хэрэг өдгөө прокурорт шалгагдаж байгаа билээ.