УИХ-ын гишүүн асан Б.Ундармаа, түүний нөхөр “Бишрэлт” группын захирал  А.Ариунболд нарыг АТГ-аас багагүй хугацаанд шалгаж буй. Тэднийг Эрүүл мэндийн даатгалын сан, Нийгмийн даатгалын сангийн мөнгийг үрэн таран хийж, улсад онц их хэмжээний хохирол учруулсан хэрэгт шалгаж, хорих ял оноож байсан билээ. Тэгвэл энэ удаад тэднийг Хөгжлийн банкны хэрэгт холбогдуулан шалгаж байгаа. Улмаар уг хэрэгтэй холбоотойгоор “Бишрэлт” группын захирал А.Ариунболдыг Цагдан хорих 461 дүгээр ангид саатуулан шалгаж эхэлсэн. Мөн хууль хяналтын байгууллагаас тус компанийн эд хөрөнгийг битүүмжлээд байгаа юм.

           Эх сурвалжийн мэдээлснээр А.Ариунболд, Б.Ундармаа нарын битүүмжилсэн хөрөнгийг бүхэлд нь Засгийн газрын мэдэлд шилжүүлэн өгч, улсыг хохиролгүй болгох шийдвэрийг хууль, хяналтын байгууллагаас гаргаад байгаа гэнэ. Өөрөөр хэлбэл, авсан зээл болон хадгалж байсан төрийн мөнгийг зориулалт бусаар ашиглаж, зарцуулсан нь мөрдөн шалгах ажиллагааны явцад тодорхой болсон учир ийнхүү шийдвэрлэсэн байна.

Ташрамд дурдахад, УИХ-ын гишүүн асан Б.Ундармааг МАН-ын гишүүнээс түдгэлзүүлж, хөөх шийдвэрийг МАН-ын Хяналтын хорооны зөвлөлийн хурлаар шийдвэрлэж, шийдвэрийг өнгөрсөн баасан гарагт уншиж, танилцуулсан байдаг.