МАН-ын Хяналтын ерөнхий хороо хуралдаж, нэр бүхий гишүүдээ хасах, намын гишүүнчлэлээс түдгэлзүүлэх шийдвэр гаргаснаа танилцууллаа.

Тодруулбал, Хөгжлийн банкны найдваргүй зээлдэгчдийн асуудалтай холбогдуулан УИХ-ын гишүүн асан Г.Солтан, Б.Ундармаа, Д.Дамба-Очир, Б.Батзориг, Д.Хаянхярваа гэсэн таван хүнийг МАН-ын гишүүнчлэлээс хасаж, намаас гарсанд тооцсон байна. Мөн таван хүнийг МАН-ын Бага хурлын гишүүнээс хасах тухай шийдвэр гаргажээ. 

Мөн Ж.Эрдэнэжамъян, Б.Даваасамбуу, Э.Цасчихэр, Г.Батсайхан,  Д.Дуламсүрэн нарын таван хүнийг МАН-ын Бага хурлын гишүүнээс хасах шийдвэр гаргажээ. Харин Хөгжлийн банктай нэр холбогдсон УИХ-ын гишүүн С.Бямбацогт, Х.Ганхуяг, Г.Дамдинням, УИХ-ын гишүүн асан А.Сүхбат, М.Билэгт, БХБ-ын дэд сайд асан Ш.Лхамсүрэн, НИТХ-ын төлөөлөгч асан Ш.Үнэнбат нараас тайлбар авахаар болжээ. 

        МАН 30 дахь их хурлаараа намын дүрэмдээ өөрчлөлт оруулж, авлига, албан тушаалын гэмт хэрэгт холбогдсон, албан тушаал, эрх мэдлээ ашиглан авлига, албан тушаалын гэмт хэрэг үйлдсэн нь шүүхээр тогтоогдсон, яллагдагчаар татагдсан тохиолдолд намын гишүүнчлэлээс хасах, бүх шатны сонгуульд нэр дэвших эрхийг нь хязгаарлах тухай хатуу заалт тусгасан байдаг.