МАН-ын Хяналтын ерөнхий хороо маргааш 11:00 цагаас хаалттай хуралдахаар болжээ. Уг хурлаар ёс зүйн асуудал гаргасан гишүүддээ хариуцлага тооцох асуудлыг хэлэлцэн шийдвэр гаргах аж. “Өөрөөр нь төлүүлье” хэлэлцүүлгийн үеэр МАН-ын нарийн бичгийн дарга Д.Амарбаясгалан “Хөгжлийн банкнаас зээл авсан, чанаргүй зээлдэгч нарт хариуцлага тооцох, намын гишүүнээс түдгэлзүүлэх шийдвэр гаргана” хэмээн хэлж байсан билээ. Тэгвэл маргааш болох хаалттай хуралдааны үеэр МАН хэд хэдэн гишүүнээ намын гишүүнчлэлээс түдгэлзүүлж, заримыг хөөх шийдвэр гаргах гэнэ.

         Ёс зүйн асуудал гаргаж, МАН-аас хөөгдөх, гишүүнээсээ түдгэлзэж магадгүй хүмүүсийг танилцуулж байна.

УИХ-ын гишүүн асан Б.Ундармаа, А.Сүхбат, Б.Элдэв-Очир, С.Бямбацогт, УИХ-ын гишүүн Х.Ганхуяг, Г.Амартүвшин, Ц.Анандбазар, Ч.Ундрам, Б.Эрдэнэбат, Ё.Отгонбаяр нарын хүмүүсийг МАН-ын гишүүнээс түдгэлзүүлж магадгүй хувилбар яригдаж байгаа ажээ.

Мөн УИХ-ын гишүүн Ц.Анандбазар, Боловсрол, шинжлэх ухааны сайд асан Ё.Отгонбаяр нарыг намаас хөөх шийдвэр гаргасан байж болзошгүй гэнэ. Тодруулбал, Ё.Отгонбаяр нь сэтгүүлчдийн амь насанд заналхийлж, “Ална” хэмээн сүрдүүлсэн билээ.

МАН-ЫН ҮНДСЭН ДҮРЭМ

4 дүгээр зүйл. Монгол Ардын Намын гишүүний эрх, үүрэг

-4.2.5. Намын эв нэгдлийг хамгаалах, намын нэр хүндийг гутаасан аливаа үйлдэл гаргахгүй байх;

-4.2.9. Намын ёс зүйн хэм хэмжээг сахин биелүүлэх.

6 дугаар зүйл. Монгол Ардын Намын гишүүнээс гарах

6.5. Монгол Ардын Намын гишүүнийг дараах тохиолдолд намаас гарсанд тооцно:

6.5.1. намаас Улсын Их Хурал болон орон нутгийн сонгуульд нэр дэвшигчтэй зэрэгцэн бие даан нэр дэвшсэн нам болон намын нэр дэвшигчийн эсрэг сурталчилгаа хийсэн

6.5.2. намаас сонгогдсон буюу томилогдон төрийн өндөр албан тушаал эрхэлж байх хугацаандаа авлигын гэмт хэрэг үйлдсэн болох нь шүүхийн шийдвэрээр тогтоогдсон;

6.5.3. намын бүх шатны сонгуульд нэр дэвшигч нь санал худалдаж авах үйлдэл гаргасан.

6.5.4. намын албан ёсны шийдвэр буюу олонхийн саналаар шийдвэрлэсэн асуудлаар энэ дүрмийн 1.5.4-т заасан зарчмыг зөрчсөн.