УИХ-ын дарга Г.Занданшатарын захирамжаар Хөгжлийн банкыг шалгах ажлын хэсэг байгуулж, ахлагчаар нь УИХ-ын гишүүн Б.Баттөмөрийг томилсон. УИХ-ын дээрх ажлын хэсэг нэн тэргүүнд Хөгжлийн банктай холбоотой зээлийн мэдээллийг цуглуулж, хөндлөнгийн хараат бус аудит оруулах ажлыг нэн тэргүүнд эхлүүлэх төлөвлөгөө гаргасан талаар бид мэдээлсэн.

      Харин ажлын хэсгийн багт ямар хүмүүс багтсан бэ гэдэг нь олны дунд маргаан дагуулаад байна. Тэгвэл энэ талаар бид тус ажлын хэсгийн ахлагч Б.Баттөмөрөөс тодрууллаа. Тэрбээр "Хөгжлийн банкыг шалгах ажлын хэсгийг би ахлахаар болсон. Одоогоор дөнгөж ажилтайгаа танилцаж, төлөвлөгөө гаргаж байна. Манай ажлын хэсэгт УИХ-ын гишүүн Ч.Хүрэлбаатар, Ц.Даваасүрэн, Б.Энхбаяр, Б.Бат-Эрдэнэ, Б.Пүрэвдорж нарын нэр яригдаж байсан. Хөгжлийн банкыг шалгах ажлын хэсгээс Б.Энхбаяр, Ч.Хүрэлбаатар нар нэрээ татсан

Одоо ажлын хэсэгт Ц.Даваасүрэн, Б.Бат-Эрдэнэ, Б.Пүрэвдорж, С.Чинзориг нарын гишүүд багтсан байна. Б.Энхбаяр гишүүний тухайд өмнө нь Хөгжлийн банкыг шалгах албанд томилогдож байсан учир энэ удаад орохгүй гэсэн. Харин Ч.Хүрэлбаатар гишүүн олон ажлын хэсэгт багтсан тул энэ удаад нэрээ татсан" гэх тайлбарыг өглөө.