УИХ-ын чуулганы өнөөдрийн нэгдсэн хуралдааны эхэнд УИХ дахь АН-ын бүлэгт үүсээд буй асуудлыг шийдвэрлэхийг тус бүлгийн гишүүд УИХ-ын даргаас хүссэн юм.  Энэ үеэр УИХ-ын гишүүн О.Цогтгэрэл “УИХ дахь АН-ын бүлэг бүрэн бүрэлдэхүүнээрээ хуралдах аргагүй болоод гурван сар өнгөрлөө. Бид 2021 оны аравдугаар сард УИХ-ын даргад бүлгийн даргаас Д.Ганбатыг чөлөөлөх асуудлыг албан бичгээр хүргэсэн. Бүлгийн үйл ажиллагааг хэвийн явуулах боломжоор хангаж, бүлгийн гишүүдийн олонх бидний хүсэлтийг шийдвэрлэж өгөхийг УИХ-ын даргаас хүсэж байна” гэв. Харин  УИХ-ын дарга Г.Занданшатар “АН-ын бүлгийнхэн төрийн үйл ажиллагааг хэвийн явуулна шүү. Нам доторх албан тушаалын асуудлаа нам дотроо шийдвэрлэх хэрэгтэй. Дотоод асуудлаа УИХ, төрийн ажилд хутгах хэрэггүй” гэлээ.