Улсын Их Хурлын ээлжит нэгдсэн чуулган өнөөдөр болж байна. Энэ үеэр Улсын Их Хурлын гишүүн Н.Алтанхуяг Монголын Үндэсний Олон Нийтийн Pадио Телевизийн гишүүнийг томилох талаар санал хэллээ. Тэрбээр "Би МҮОНРТ-ийн хуулийг уншлаа. Бид хүн томилох, чөлөөлөх асуудал яах вэ. Энэ телевиз төрөөс татвар төлөгчдийн мөнгөөр санхүүжиж байгаа энэ хүмүүс үүргээ гүйцэтгэн ажиллаж чадаж байна уу гэдэгт анхаармаар байна. Ихэнхдээ нь зодоон хийсэн, дарга, цэргээ сольсон зэрэг бусармаг газар болчихоод байна. Нийт 15 гишүүнтэй энэ телевизийн долоон хүнийг нь УИХ, дөрвийг нь Ерөнхийлөгч, үлдсэн дөрвийг нь Засгийн газар санал болгодог юм байна. Тэгэхээр УИХ-аар хэсэг хүмүүс томилчихоод юу хийж байгааг нь сонсмоор байна. Угтаа бол энэ телевизийн хийх, баримтлах зүйл нь олон нийтийн эрх ашигт үйлчилдэг, тэдний өмнө хариуцлага хүлээж, хяналтад нь үйл ажиллагаагаа явуулдаг, ашгийн төлөө бус, төрөл бүрийн мэдээлэл, сургалт танин мэдэхүй, хөгжөөнт цэнгээнт зэрэг нэвтрүүлэг бэлтгэх, хараат бус байх, бодит мэдээлэл олж авах иргэний эрхийг хүндэтгэх, олон ургалч үзэлтэй байх гээд заачихсан байна. Олон ургалч үзэл гэж огт байхгүй болсон. Зүгээр л эрх баригч намыг магтан дуулдаг телевиз боллоо. Тэгэхээр энэ дээр анхаарах болсон байна, үүнийг хэлэлцэх асуудалд оруулж өгөх хэрэгтэй байх. Ер нь УИХ-аар томилоод гаргасан хүмүүс юу хийж байгааг сонсмоор байна" гэв.