Ардчилсан намынхан цаг үеийн асуудлаар мэдээлэл өглөө. Энэ үеэр Ардчилсан намын Ерөнхий нарийн бичгийн дарга Ч.Өнөрбаяр “Монгол Улсын Үндсэн хууль бидэнд маш их ололт амжилт өгсөн.  Монгол хүн төр засгаа байгуулж, үгээ хэлдэг, өмчөө шударгаар хуваадаг байх ёстой. Монгол Улсын бодлогыг гаднын хэн нэгэн заадаг биш, өөрсдөө дэлхийн бусад улсуудтай эн тэнцүү харилцаж, бодлого, төлөвлөгөөгөө гаргадаг байх нь зүйтэй. Манай улс энхийг эрхэмлэсэн гадаад бодлого явуулах тухай суурь зарчмуудаа зарлан тунхагласан. Одоогоор 90 гаруй улстай дипломат харилцаатай байна. Ардчилсан үндсэн хуулиа баталснаар монголчууд даяаршсан. Манай залуучууд дэлхийн алдартай сургуулиудад сурч, аялж эх орноо таниулж байна. Энэ бол Ардчилсан Үндсэн хуулийн үр шим юм. Гэхдээ Үндсэн хуулиа дээдлэх чухал ойлголтыг дарга, эрх бүхий албан тушаалтнууд, улс төрийн намууд буруу ойлгосоор байна. Үндсэн хуулийг Ерөнхийлөгч тангараг өргөхдөө ашигладаг зүйл биш. Ардчилсан үндсэн хуулийг алхам тутамдаа мөрдөж байх ёстой оюуны үнэт зүйл юм. Үндсэн хуулийг тогтоогч нь Монголын ард түмэн байдаг. Сүүлчийн жилүүдэд Үндсэн хуулийг дээдлэх ойлголт хөсөрдөж, эрх мэдэлтнүүд хуулийнхаа дээгүүр алхаж байна. Улстөрчид Үндсэн хуулиа баримталж, дээдэлж ажиллана гэж тангараг өргөдөг. Харин сонгогдсоныхоо маргааш “Хууль юу юм бэ” гэж ярьж, хуулийг үгүйсгэдэг” гэлээ.