Засгийн газрын ээлжит хуралдаанаас гаргасан шийдвэрийг танилцуулж байна. Ерөнхий сайдын хэвлэлийн төлөөлөгч Ч.Болортуяа “Өнөөдрийн байдлаар дэлхийн 147 улсад коронавирусийн омикрон хувилбар тархаад байна. АНУ, Норвег, Их Британи, Итали, Франц зэрэг улсад томоохон давлагаа үүсээд байна. АНУ-д гэхэд өдөрт нэг сая тохиолдол бүртгэгдэж байгаа. Харин Итали Улсад 200 мянга орчим хүн өдөрт халдвар авч байна. ДЭМБ энэ эрчээрээ халдварын тархалт  нэмэгдвэл вакцины хамралт бага Европын улсуудын 50 хувь нь нэг, хоёрдугаар сард халдвар авах эрсдэлтэй байгааг анхааруулсан. Дэлхийн бүх улс омикрон халдварын тархалтыг хэрхэн хохиролтой багатай давах арга замыг хайсаар байна. Иймд иргэдийг нэмэлт тундаа хамрагдах уриалгыг Засгийн газар, ЭМЯ, УОК гаргаж байна. Омикрон хувилбарын илрэх хугацаа гурван хоног гэж үзэж байгаа. Монгол Улсад омикрон хувилбарын тархалтын оргил үе энэ сарын сүүлч, ирэх сарын эхээр байна гэж эрдэмтэн, судлаачид үзэж байгаа. Өнөөдрийн байдлаар дөрөвдүгээр тундаа 10247 хүн хамрагдсан байна. Ерөнхий сайд өнөөдрийн хуралдаанаар холбогдох албан тушаалтнуудад зарим үүрэг даалгаврыг өглөө. Нэгдүгээрт, вакцины нэмэлт тундаа хамрагдах ажлыг идэвхжүүлэх, хоёрдугаарт, гадаад улсаас ирж байгаа иргэдийг омикрон хувилбараас сэргийлэх зорилгоор гурван хоног тусгаарлаж байсан хугацааг цуцлах чиглэл өгсөн. Гуравдугаарт, гадаад улсаас ирсэн иргэдийг онгоцны буудал, хилийн боомтуудад PCR  шинжилгээнд хамруулах, шинжилгээг төлбөртэй авах үүрэг чиглэл өгсөн” гэлээ.