МАН-ын бүлгээс цаг үеийн асуудлаар мэдээлэл хийж байна.

             МАН-ын Бүлгийн дарга Д.Тогтохсүрэн “МАН-ын бүлгийн ээлжит хурал дууслаа. Хурлаар хоёр асуудлыг хэлэлцлээ. Нэгдүгээрт, өнгөрсөн долоо хоногт УИХ-аар хэлэлцсэн, Засгийн газраас өргөн барьсан Холбооны эрх зүйн байдлын тухай хуулийн шинэчилсэн найруулгын төсөл, Сангийн эрх зүйн байдлын тухай хуулийн шинэчилсэн найруулга хоёрыг намын бүлгийн хурлаар хэлэлцэж, шийдлээ. УИХ-ын нэгдсэн чуулганы үеэр гишүүд санал зөрөлдсөн учраас МАН-ын бүлгээс завсарлага авсан. Завсарлага авч, өнөөдөр хурлаар дахин хэлэлцлээ. Хурлаар дээрх хоёр хуулийн шинэчилсэн найруулгын төслийг үзэл баримтаар дэмжлээ. УИХ-аар хэлэлцэж, дэмжигдсэний дараа ажлын хэсэг байгуулж, ажиллахаар болсон. Ажлын хэсэгт олон тооны гишүүнд, Сангийн чиглэлээр үйл ажиллагаа явуулж байгаа ТББ-ын хүмүүсийг оролцуулж, өргөн хүрээний хэлэлцүүлэг зохион байгуулах нь зүйтэй гэж үзлээ. Тийм учраас хаврын чуулганаар үргэлжлүүлэн хэлэлцэхээр боллоо.

Хоёрдугаарт, өнөөдрийн хуралд МАН-ын дарга, Ерөнхий сайд Л.Оюун-Эрдэнэ оролцож, хоёр чиглэлээр мэдээлэл хийлээ. Нэгдүгээрт, гадаад нөхцөл байдлын талаар мэдээлэл хийж, хоёр хөрш болон Казакстан Улсын нөхцөл байдал, тус улсад байгаа монголчуудын асуудлаар ярилцлаа. Казакстанд байгаа манай улсын иргэдийн эрх ашиг хөндөгдөж байгаа эсэх талаар  ЭСЯ, Консулын газар анхааран ажиллах шаардлагатай байна гэж үзсэн.

       Мөн улс орны дотоод нөхцөл байдлын талаар мэдээлэл хийлээ. Дотоод нөхцөл байдалтай холбоотой хэлэлцэх хэд хэдэн асуудал бий. Үнийн өсөлтөд анхаарч ажиллах, арга хэмжээ авах шаардлагатай байна гэж УИХ, Засгийн газар үзэж байгаа. Тэтгэвэр тэтгэмжийг нэмэх асуудал бий. Үүн дээр Засгийн газар тодорхой судалгаа хийж, ажиллана. Хил, гааль хаагдсан байгааг нээж, бараа бүтээгдэхүүний хомсдол үүсэхгүй байх тал дээр онцгой анхаарч ажиллах талаар хэлэлцлээ. Мөн утааны асуудлыг ч Бүлгийн хурлаар ярилаа” гэлээ.