-ХҮН ТӨРӨЛХТНИЙ ӨМНӨ ТУЛГАРСАН ГАМШИГТ ТАХЛЫГ ТӨРИЙНХӨН ЭРХ МЭДЭЛД ХҮРЭХ БОЛОМЖ БОЛГОЖ ЭХЭЛЛЭЭ-

        Үнэндээ ковидын аюулд тэр аяараа нэрвэгдсэн монголчууд сэхэл авч амжилгүй омикронд онилуулчихаад, хэн хүнгүй тархах нь цаг хугацааны бус өнөө, маргаашийн асуудал болчихлоо. Гэтэл Монголын төр засагт омикроны эсрэг 2050 зорилт, МАН-ын хөтөлбөрөөс өөр бэлдсэн “бамбай” алга.

      Тусгаарлалтын байрны бохир заваан, хүйтэн, стандарт бус асуудлууд, хоол, ундны шим тэжээлгүй байдал, эмнэлгийн ачаалал, орны хүрэлцээ, эм, тарианы тасалдал, эрчим хүчний доголдол, шатахуун түлшний хомсдол, хүнс тэжээлийн гачигдал, бизнесийнхний дампуурал, иргэдийн ядуурал, Улаанбаатарын уушги “базсан” өтгөн хар утаа гээд ядаж өмнөх жилийнхээс сайжирсан, зассан, тодорхой аюулд бэлдсэн, сэлбэсэн зүйл Монголд үнэндээ алга. Бүх зүйл өмнөхөөсөө хэд дахин дордсон, элэгдсэн, хоосорсон дүр төрхтэй л сууна, монголчууд. Хамгийн наад захын жишээ нь, зөвхөн омикроны эсрэг эмчилгээ хийлгэе гэхэд шаардлагатай эм, тарианууд нь олдохгүй, тасалдсан, олдож байгаа нь тэнгэрт тулсан үнэтэй болсон байдалтай байна. Хил хаалттай, хэнээс ч тусламж эрэх “нүүргүй” төр, засгийнхан энэ бүхнийг мэдэхийн дээдээр мэдэж байгаа ч мэдээгүй, сонсоогүй, хараагүй дүр эсгэсээр л байна. Бүр ядахдаа “Монголд илрээгүй омикрон нь гаднын оронд очоод илэрчихлээ” хэмээн дэлхий даяар сошиалаар буллидуулж байх вэ дээ. Дэлхий даяар хэдхэн секундын дотор илрүүлж байгаа омикрон вирусийг Монгол Улс 30 хоногийн дараа мөн эсэхийг нь тогтооно гээд сууж байна шүү дээ. Тэгээд болоогүй “Шинжилж байх хооронд нь омикроноор халдварласан өвчтнүүд нь эдгэрчихсэн байна лээ” гээд хээв нэг ярьж байна.

      Гэхдээ бүх зүйл “найруулга”-ын дагуу л явж байна. Тэд коронавирусийн мутацилагдсан омикрон вирус Монголд “орж” ирснийг зарлана гэсэн цагтаа л зарласан. Өдөр ирэх тусам халдварлагсдын тоо нэмэгдэх омикрон бол ард түмнийг хүлцэнгүй, дуулгавартай, айдастай болгоно. Энэ нь Засгийн газрын бүтцээ хүссэнээрээ бүрдүүлж, улс төрийн “наймаа”-ны хүмүүсээ томилдгоороо томилж, Үндсэн хуульд өөрсдийнхөө хүссэнийг дураараа “бичиж”, эрх мэдлээ дархлахад нь “туслах” ёстой. Гэхдээ энэ бүхнийг нэг амьсгаагаар шууд явуулж болохгүй учир дундуур нь Ерөнхийлөгч асан Х.Баттулгыг АН-ыг авсан аваагүй тухайгаас гадна шинээр байгуулах хоёр яамныхаа Төрийн нарийнуудыг шууд нэрлэж, Хотын дарга Д.Сумъяабазар, ХӨСҮТ-ийн Д.Нямхүү тэргүүтэй албан тушаал хийгээд анхаарал татах хүрээ нь ач холбогдолтой мэт харагдах ганц нэг хүний тухай болсон болоогүй баримт “сэвж”, хачирлах ёстой. Энэ нь ч төлөвлөгөөний дагуу явж л байна. Эдгээрээс гадна хэн нэгний нууц бичлэг, зодоон цохионы зангилаа, архидалт, авлигын сүлжээг илрүүлж, ард түмэнд баатар болох бас нэг чухал ажиллагаа заавал байх ёстой. Бичлэг цацагдаж, олон нийт шимтэн үзэхтэй зэрэгцээд тэд ажлаа эхлэх учиртай. Өмнөх хоёр жил ийм л дэс дараалал, үйл явдлуудын дараа Засгийн газар хүссэн төлөвлөгөөгөө хэрэгжүүлж, хөдөлж эсвэл унаж ирсэн билээ. Бичлэг энэ тэр олдохгүй бол омикроны улмаас хатуу хөл хорио тогтооно, хаана, хаалттай хуралдана, хэн ч асуух эрхгүйгээр шийдвэрлэнэ. Ердөө л энэ.

        Өөрөөр хэлбэл, хүн төрөлхтний өмнө тулгарсан гамшигт өвчин, тахал төрийнхний томрох, эрх мэдлээ зузаатгах боломж нэгэнт болсон гэсэн үг. Үүний хамгийн тод жишээ бол сонгон шалгаруулалтгүйгээр, аль ч хууль, дүрэм, журмыг хэрэгсэхгүйгээр хэн дуртайгаа төрийн албанд томилж, дарга, цэрэг болгож, түүндээ амтшиж буй байдал билээ. Гэхдээ чухал нь, тэдний бидэнд толилуулах дараагийн “үзэгдэл” углааштай эмэгтэйгээс өөр зүйл байгаасай...

 Тусгаарлалтын байрны бохир заваан, хүйтэн, стандарт бус асуудлууд, хоол, ундны шим тэжээлгүй байдал, эмнэлгийн ачаалал, орны хүрэлцээ, эм, тарианы тасалдал, эрчим хүчний доголдол, шатахуун түлшний хомсдол, хүнс тэжээлийн гачигдал, бизнесийнхний дампуурал, иргэдийн ядуурал, Улаанбаатарын уушги “базсан” өтгөн хар утаа гээд ядаж өмнөх жилийнхээс сайжирсан, зассан, тодорхой аюулд бэлдсэн, сэлбэсэн зүйл Монголд үнэндээ алга