Засгийн газрын ээлжит бус хуралдаанаар хоёр яам шинээр байгуулах бүтцийн асуудлыг хэлэлцэж, зарим томилгоог хийв. Тодруулбал, Эдийн засгийн хөгжлийн яамыг Сангийн сайд Б.Жавхлан,  Цахим хөгжил, харилцаа холбооны яамыг Боловсрол, шинжлэх ухааны сайд Л.Энх-Амгалан нарт түр хугацаагаар давхар хариуцахаар болсон.  Харин тус яамдын төрийн нарийн бичгийн даргыг түр орлогчоор Б.Болор-Эрдэнэ, Х.Батжаргал нарыг томилохоор болсон талаар бид мэдээлсэн.

Тэгвэл хоёр яамны Төрийн нарийн бичгийн түр орлон гүйцэтгэгчээр томилогдсон Х.Батжаргал, Б.Болор-Эрдэнэ нар дээрх албан тушаалыг хашихад хуулийн шаардлагад нийцэж байгаа юу гэдэг нь маргаан дагуулж байна. Тодруулбал, Төрийн албаны тухай хуулийн 23 дугаар зүйлд Төрийн албан тушаалд тавих тусгай шаардлагын талаар тодорхой заасан байдаг.

• Хуулийн 23.2.1.тэргүүн түшмэлийн ангилалд хамаарах албан тушаалд томилогдох бол төрийн албанд 16-аас доошгүй жил, үүнээс эрхэлсэн түшмэлийн албан тушаалд 8-аас доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх;
• 23.2.2.эрхэлсэн түшмэлийн ангилалд хамаарах албан тушаалд томилогдох бол төрийн албанд 12-оос доошгүй жил, үүнээс ахлах түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх;
• 23.2.3.ахлах түшмэлийн ангилалд хамаарах албан тушаалд томилогдох бол төрийн албанд 8-аас доошгүй жил, үүнээс дэс түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх гэсэн шаардлага тавьдаг.

Харилцаа холбоо, мэдээллийн технологийн газрын даргаар ажиллаж байсан Б.Болор-Эрдэнэ нь Цар тахлын хуулиар төрийн албанд сонгон шалгаруулалтгүй томилогдсон гэх шүүмжлэлд өртөөд байгаа нэгэн. Түүнчлэн тэрбээр төрийн албанд хоёр жил ажилласан учир Төрийн нарийн бичгийн даргаар ажиллах хуулийн шаардлагад нийцэхгүй. Харин Х.Батжаргалын тухайд 2014 оноос төрийн албанд ажиллаж эхэлсэн бөгөөд мөн л хуулийн шаардлагыг хангахгүй байгаа юм.