Засгийн газрын ээлжит бус хуралдаанаар хоёр яамны бүтцийг батлах асуудлыг хэлэлцэн шийдвэрлэжээ. Тодруулбал, Эдийн засаг, хөгжлийн яам болон Цахим хөгжил, харилцаа холбооны яамны үйл ажиллагааны стратеги, зохион байгуулалтын бүтцийн өөрчлөлтийн хөтөлбөр, зохион байгуулалтын бүтэц, орон тооны дээд хязгаарыг баталсан байна. Дээрх хоёр яамны бүтцийг баталсантай холбоотой хэн удирдах вэ гэдэг нь олны дунд хүлээлт үүсгээд байгаа. Тэгвэл Засгийн газрын хоёр сайд давхар үүрэг гүйцэтгэж, чиглүүлэхээр болсон талаар эх сурвалж мэдээллээ. Тодруулбал, Эдийн засгийн хөгжлийн яамыг Сангийн сайд Б.Жавхлан,  Цахим хөгжил, харилцаа холбооны яамыг Боловсрол, шинжлэх ухааны сайд Л.Энх-Амгалан нарт түр хугацаагаар давхар хариуцуулахаар болсон байна. 

    Мөн яамдын төрийн нарийн бичгийн даргыг түр орлогчоор Б.Болор-Эрдэнэ, Х.Батжаргал нарыг томилох шийдвэр гаргасан байна. Б.Болор-Эрдэнэ, Х.Батжаргал нар нь Харилцаа холбоо, мэдээллийн технологийн газар, Үндэсний хөгжлийн газарт даргаар ажилладаг бөгөөд өнөөдрийн хуралдаанаар дээрх хоёр агентлагийн татан буулгах шийдвэр гаргажээ.