УИХ-ын гишүүний ёс зүйн дүрэм шинэчлэн батлагдсантай холбогдуулж Ёс зүй, сахилга хариуцлагын байнгын хорооны дарга Б.Бат-Эрдэнэ  мэдээлэл өглөө.

      Тэрбээр "УИХ-ын гишүүний ёс зүйн дүрэм энэ оны нэгдүгээр сараас хэрэгжиж эхэлж байна. УИХ-ын ёс зүй, сахилга хариуцлагын байнгын хороо гишүүдийн авлига албан тушаалын хэргийг авч хэлэлцэж, шийдвэрлэдэг мэтээр ойлголт төрүүлээд байна. Бид ёс зүйн асуудлын хүрээнд асуудлыг хэлэлцэнэ. Гэмт хэргийн шинжтэй асуудлыг хуулийн байгууллагад шилжүүлж, шийдвэрлүүлнэ. УИХ-ын гишүүний улс төрийн хариуцлага байвал нам нь шийдэх ёстой. Хуулийн дагуу бүрэн эрхийг нь түдгэлзүүлэх асуудлыг Халдашгүй байдлын дэд хороо авч хэлэлцэнэ.

    2009 онд анх УИХ-ын гишүүний дүрэм баталж байсан. Ёс зүйн хүрээнд шийдэх хамгийн том асуудал бол уучлал гуйх. УИХ-ын гишүүн ёс зүйн зөрчилд холбогдсон байвал ард түмэн, иргэд сонгогчдоосоо уучлалт гуйх, уучлалт гуйсан бол тав хоногийн дотор парламентын хэвлэл мэдээллийн хэрэгслээр дамжуулах зохицуулалтыг тусгасан. Хамгийн гол нь УИХ-ын гишүүн бүрэн эрхээ хэрэгжүүлэхдээ нийт иргэн, улсын ашиг сонирхлыг эрхэмлэж, төрт ёс, түүх соёлынхоо уламжлалыг хүндэтгэж, Үндсэн хуулийг дээдлэн сахиж, авлига, ашиг сонирхлоос ангид байхаа чин шударгаар биелүүлнэ. Энэ тангаргаасаа няцвал хуулийн хариуцлага хүлээнэ гэж тангарагладаг. Энэ тангаргийг нь биелүүлэхэд Ёс зүйн дүрэм чиглэж байгаа.Түүнчлэн УИХ-ын гишүүн бүрэн эрхийн хугацаанд эцэг, эх, төрсөн ах дүү, гэр бүлийн гишүүн, хамтран амьдрагч, эхнэр нөхрийн эцэг, эх зэрэг хамаарал бүхий этгээдээ төрийн албан тушаалд томилуулах, санал болгохыг хориглох зохицуулалт хийсэн. Ингэснээр төрийн албыг төрлийн алба болгох асуудлыг хааж өгч байгаа юм" гэлээ.