УИХ-ын Эдийн засгийн байнгын хорооны хуралдаанаар Эдийн засгийг сэргээх 10 их наядын төгрөгийн цогц хөтөлбөрийн хэрэгжилтийн талаар мэдээлэл сонсож байна. Танилцуулгатай холбоотой УИХ-ын гишүүд асуулт асууж, хариулт авч байна.

УИХ-ын гишүүн Б.Энхбаяр: Засгийн газар, Төв банк хоёр нэг "хөнжилд" удаан хугацаагаар орж болохгүй. Үерхэл хугацаатай байх ёстой. Та бүхэн энэ талаар ямар бодолтой байна вэ. Ипотекийн зээлийг үргэлжлүүлэх талаар ямар байр суурьтай байгаа. Ипотекийн зээлийн санхүүжилтийг үргэлжлүүлэх асуудалд Монголбанкны Ерөнхийлөгч болон Сангийн сайдын үг яриа зөрсөн.

Хоёрдугаарт,  манайх гурван боомтоос, гурван түүхий эдээс эдийн засаг нь хамааралтай. Гэтэл чоно борооноор гэгчээр зарим хүн дураараа дургиж байна. Замын-Үүд Эрээний чиглэлд 14 галт тэрэг өдөрт гарч, дөрөв нь төмрийн хүдэр гаргаж байна. Гэтэл аж ахуйн нэгжүүд бараа таваараа оруулж ирж чадахгүй, авлига цэцэглэж байна. Цар тахлын үеийн авлигаас 10 дахин их авилга өгдөг болсон гэнэ. Их авлига өгсөн нь галт тэргээ явуулж байгаа юм байна. Төмөр зам энэ дээр ямар бодлого барьж байна вэ.

Гуравдугаарт, цар тахлын үед 1059 тоглолт бэлтгэсэн гэнэ. "Карентин 14", "Ковидгүй зун" гээд гараад л байсан. Үүнийг улсын төсвөөс хийгээгүй гэж байсан. Гэтэл төсвөөс хийсэн юм биш үү. 

Сангийн дэд сайд С.Мөнгөнчимэг: Цахим контент дээр төсвөөс мөнгө гараагүй. Соёлын сайдын багцад яаж зохицуулалт хийснийг яамнаас нь тодруулах нь зөв байх. Ипотекийн зээлийг зургаан сараар сунгасан. Энэ зээлийн Монголбанк, Барилга хот байгуулалтын яам хэрэгжүүлдэг. Сангийн яам энэ зээлийг авахад хүндрэлтэй гэдэг байр суурьтай байдаг.

Соёлын дэд сайд М.Батбаяр: 10 их наядын төлөвлөгөөний дагуу манай яамны хариуцах гурван асуудал байсан. Нийгмийн сэтгэл зүйг дэмжих хүрээнд найман контент бэлтгэсэн. 10 их наядын хөтөлбөрөөс мөнгө зарцуулаагүй. Харин Наадам контентийг бэлтгэхэд Ардын хувьсгалын 100 жилийн ойн хөрөнгөөс зарцуулсан. 980 сая төгрөг гаргасан.