Сүүлийн хагас жил шахуу нэгдсэн ирцтэйгээр хуралдаж чадахгүй, ганцхан гишүүнтэй хуралддаг болсон УИХ-ын АН-ын бүлгийн асуудал өнөө хэр нь цэгцрээгүй байна.

Өнөөдөр УИХ дахь намын бүлгүүд хуралдах товтой байсан. УИХ дахь МАН-ын Бүлгийн хуралдаан Төрийн ордны “Жанжин Д.Сүхбаатарын танхим”-д өглөөний 10:00 цагт хуралдсан. Харин УИХ дахь АН-ын Бүлгийн хурал “Их эзэн Чингис хаан танхим”-д болсонгүй.

      Өнгөрсөн онд УИХ-ын гишүүн Д.Ганбатад УИХ дахь АН-ын бүлгийн гишүүд итгэл үзүүлэлгүй огцруулснаас хойш өнөөдрийг болтол нэгдэж хуралдаж чадахгүй байгаа нь Парламент дахь сөрөг хүчний хүчийг сарниулах гэсэн эрх баригчдын оролдлого гэлтэй. Учир нь УИХ дахь АН-ын Бүлгийн даргаар ажиллаж байсан УИХ-ын гишүүн Д.Ганбат нь өнгөрсөн онд Засгийн газрыг огцруулах гарын үсэг зурсан УИХ дахь АН-ын бүлгийн гишүүдээсээ нууцаар эрх баригчидтай уулзан Засгийн газраас гурван сайдын суудал шаардаж яваад Бүлгийн гишүүддээ баригдаж шившигээ дэлгэсэн билээ. Энэ хариуцлагагүй үйлдлээсээ болж УИХ-ын гишүүн Д.Ганбат Бүлгийн даргаасаа огцорсон ч одоог хүртэл бүлгийн даргын өрөөндөө шигдэн, ганцаараа бүлгийн хурал хийж, өөрөөсөө асуулт асууж өөрөө хариулж яваа билээ. Тэгэхээр АН-ын бүлэг УИХ дахь сөрөг хүчний ажлаа өөдтэй хийж чадахгүй байгаагийн цаад учиг нь эрх баригчдын “тавиул” болчихоод яваа УИХ-ын гишүүн Д.Ганбат болж таарав.