Тусгаарлах байртай холбоотойгоор Улсын Онцгой Комиссын шуурхай штабын нарийн бичгийн дарга Т.Баярхүү мэдээлэл өглөө. Тэрбээр “Өнөөдрийн байдлаар Дэлхийн 114 улсад Омикроны хувилбар батлагдсан байна. Үүнээс гадна тус халдварын тохиолдол бүртгэгдсэн улс орнуудад халдварын тохиолдол огцом өссөн.

Өмнө нь дельта давалгааны үед 40 мянган тохиолдол бүртгэгдэж байсан улс орнуудад  өнөөдөр 100 мянгаас илүү тохиолдол бүртгэгдэх эрсдэлтэй нөхцөл байдал үүсэж байгаа учир  УОК-оос ХӨСҮТ болон ЭМЯ-ны саналыг үндэслэн гурван хоног тусгаарлаж, шинжилгээнд хамруулах шийдвэр гаргасан.

  Энэхүү шийдвэрийг хэрэгжүүлэх хүрээнд бидэнтэй зочид буудлууд хамтарч ажиллаж байгаа. Ийнхүү зохион байгуулах үеэр зохион байгуулалтын алдаа гарч, иргэдэд хүндрэл учруулсан тохиолдол гарсан. Энэ асуудалд Улсын Онцгой Комиссоос анхаарч, алдаа дутагдлыг газар дээр нь засаж, залруулахаар ажиллаж байна. Тусгаарлалтын үйл ажиллагааг  иргэдийн хүндрэл учруулахаар зохион байгуулсан зүйл байхгүй. Харин зохион байгуулалтын явцад алдаа гарсныг хүлээн зөвшөөрч, иргэдээс уучлалт гуйж байна” гэв.