Ардчилсан намын дарга С.Эрдэнэ, Нарийн бичгийн дарга А.Цэрэнбат, Дотоод сонгуулийн хорооны дарга Х.Алтанхуяг нар цаг үеийн асуудлаар мэдээлэл хийлээ.

   Энэ үеэр Ардчилсан намын дарга С.Эрдэнэ “Хэвлэл мэдээллийн салбар хүнд байна. Өнөөдөр өдөр тутмын хэвлэлийн үйл ажиллагаа явуулж байгаа хэвлэлийг харахад ихэнх нь эрх баригчдыг магтан дуулсан, тэдний үйл ажиллагааг сурталчилсан асуудал нийт асуудлын 70-80 хувийг эзэлж байна. Маш бага орон зайн дээр нийгмийн сөрөг, дутагдлыг дурдаж байгаа. Өнгөрсөн 30 жилийн түүхэнд ардчилалд хамгийн том нээлт болж байгаа зүйл бол хэвлэл мэдээллийнхэн. Хэвлэл мэдээлэл нь худалдагдаад, амаа үдүүлээд эхэлбэл эрх баригчид даварч, дарангуйлал бий болдог.

   Үүний хариуд өнөөдөр олон улсын зах зээл дээр уул уурхай, ашигт малтмалын түүхий эдийн үнэ өндөр байгаа. Халамж, үнэгүй бүхнийг хэрэгжүүлдэг. Иймээс хүний эрх, эрх чөлөө, нээлттэй микрофоны асуудалд манай иргэд дуу хоолойгоо өргөх ёстой. Ер нь цаашлаад Ардчилсан намаас өнөөдрийн эрх баригчдын үйл ажиллагаан дээр Ардчилсан нам ажиллана” гэв.