М.Тулгат тэргүүтэй Ардчилсан намынхан мэдээлэл хийж байна. Энэ үеэр өнгөрсөн долоо хоногт болсон баярын үйл ажиллагаа, намын үндэсний анхдугаар чуулган болсон. Тус чуулганы хуралдаанаар уриа, зөвлөмж гаргасан. Зөвлөмж нь намын журмын нөхдөдөө хандсан бол уриалгыг олон нийтэд зориулж гаргасан тухай мэдээлсэн юм.

    Мөн М.Тулгат “Өнөөдөр манай улсын иргэд маш хүнд байдалд орсон. Сүүлийн 10 жилд дотоодын нийт бүтээгдэхүүн дөрвөн мянган ам.долларт хүрсэн. Өнгөрсөн хугацаанд улсын нэгдсэн төсөв тав дахин нэмэгдсэн. 30 жилийн ардчилал, зах зээлд шилжсэнээс хойш хувийн сектороо боомилж, төр улам данхайж, хувийн хэвшилд ажиллаж, бизнес эрхэлж байгаа хүмүүсийг туйлын хүнд байдалд хүргэсэн. Өнөөдөр улс төр хил гаалийн асуудлаа шийдэж чадахгүй байна. Сайд нар “Гурав хоногийн дараа хил нээгдэнэ” гэдэг. Гэтэл асуудал шийдэгддэггүй хэвээрээ. Дунд шатны хурган дарга нарын хариуцлагагүй байдлаас болж хил нээхэд асуудал үүсдэг. Хувиараа бизнес эрхэлж байгаа иргэд үстэй толгойгоо зулгааж байна. Ирээдүйгээ, амьдралаа яаж авч явахаа ойлгохгүй болсон байна. Улсын байгууллагын төрийн албан хаагчид, төрийн өмчит үйлдвэрийн газрын албан хаагчид төрөөс тендер авдаг бизнесийнхэн томорч байна. Бусад нь үнэндээ туйлдаж байна” гэв.