Ерөнхий сайд Л.Оюун-Эрдэнийг намын даргаар жинхлэх МАН-ын Их хурал үргэлжилж байна.

Хурлын үеэр Л.Оюун-Эрдэнэ “Эрхэм монголчуудаа, намын Их хурлын хүндэт төлөөлөгчид, энд хүрэлцэн ирсэн ирсэн эрхэм зочид оо, Монгол орны дөрвөн зүг, найман зовхисоос МАН-ын 278 мянган гишүүнийг төлөөлж, намын 30 дугаар Их хуралд төлөөлөгчөөр сонгогдсон та бүхэндээ чин сэтгэлийн мэндчилгээ дэвшүүлье.

            Одоогоос зуун жилийн тэртээ Монгол орны тусгаар тогтнол алдагдсан нэн хүнд цаг үед МАН-ын анхдугаар их хурал хуралдаж байлаа. Эх орноосоо харийн түрэмгийлэгчдийг хөөн зайлуулах, үндэсний тусгаар тогтнолоо сэргээн мандуулах явдал анхдугаар их хурлаар хэлэлцэж байжээ. Өнөөдрийн түүхт зуун жилийн ой тохиож буй 30 дахь их удаагийн хурал ч дэлхийн хоёрдугаар дайнаас хойш учраагүй цар тахлын нэн амаргүй үед зохион байгуулагдаж байна. МАН өнгөрсөн зууныг тусгаар тогтнолыг сэргээн мандуулж, дэлхий дахинд хүлээн зөвшөөрүүлэхийн төлөө зориулсан бол шинэ зуунд эдийн засгийн тусгаар тогтнол бие даасан байдлыг ханган хэрэгжүүлэх түүхэн үүрэг та бидэнд байна.

Эрхэм журмын нөхөд өө, 1921 онд С.Данзан, Д.Бодоо, Д.Сүхбаатар, Д.Чагдаржав, Х.Чойбалсан нар нэгдэн Монголын улс төрийн ууган хүчин МАН-ыг үндэслэн байгуулжээ. 1921 оны Ардын хувьсгал бол Үндэсний эрх чөлөөний хувьсгалын үргэлжлэл даяар Монголын гал голомтыг сэргээн мандуулах бодлого байсан юм. Ардчилсан хувьсгал бол МАН-ын хүсэлт зориг байсан юм. Ардчилал бол ард түмний засаглал. Хувь хүн биш, хууль засагладаг нийгэм юм. Ардчилал бол эрх чөлөө үүрэг хариуцлагын нийлбэр юм. Ардчилал бол иргэн бүрийн оролцоо, амьдралыг тэтгэгч анзаарагддаггүй атлаа алдрах цагтаа эрүүл нийгмийн аминд хүрч болох та бидний нүдний цөцгий мэт хайрлан хамгаалах ёстой үнэт зүйл юм. Өнөөдрийн Монголыг бүтээлцсэн үе үеийн монголчууддаа, хүндэтгэл илэрхийлэх нь зүйтэй.

Их хурлын эрхэм төлөөлөгчдөө МАН-ын хоёр зууны солбицолд бид амаргүй сорилттой нүүр тулгарч байна. Цар тахлын хүндрэл эдийн засаг, соёл гадаад харилцаанд хүчтэй доргилт өгч хүн төрөлхтний амьдралын хэмнэлийг танигдахын аргагүй өөрчиллөө.

            Цар тахлаас улбаалж эдийн засаг хасах 5.3 хувь агшлаа. 200 гаруй мянган ажлын байр бодитой эрсдэлд орсон нь 1992 оны нийгмийн шилжилтийн үетэй тоон утгаараа дүйцэх хоёр дахь хүнд үе байлаа. Цар тахлын үед МАН 2020 оны УИХ-ын сонгуульд 82.9 хувь, орон нутгийн сонгуульд 57.6 хувь, 2021 оны Ерөнхийлөгчийн сонгуульд 67 хувь ялалт байгуулж, нөхөн сонгуульд амжилттай оролцлоо. Итгэж дэмжсээр ирсэн ард түмэндээ гүн талархал илэрхийлье" гэлээ.