Өмнөд Африкийн Бүгд Найрамдах Улсын мэргэжилтнүүд коронавирусийн олон мутацтай, шинэ хувилбарыг илрүүлснээ өчигдөр зарласан. Тэгвэл уг шинэ хувилбарыг ДЭМБ “аюултай” ангилалд оруулж, “Омикрон” үсгээр нэрлээд байгаа юм. Ерөнхий сайдаас өгсөн чиглэлийн дагуу Улсын Онцгой комисс өнөөдөр 11:00 цагаас цаг үеийн асуудлаар хуралдлаа.

Хурлын шийдвэрийг УОК-ын дарга, Шадар сайд С.Амарсайхан танилцууллаа. Тэрбээр “Халдвар тархсан улс орноос ирж байгаа гадны иргэдийг хүлээж авахгүй. Харин Монгол Улсын иргэдийг 10 хоног өөрийнх нь зардлаар тусгаарлах шийдвэр гаргалаа. Ийм учраас иргэдийг бусад орон руу аялахгүй байхыг анхааруулж байна” гэлээ.